బేషరతుగా సమర్థించిన టీడీపీ
వ్యతిరేకించిన కాంగ్రెస్, ఎస్పీ, ఇతర ఇండీ కూటమి పార్టీలు
జేపీసీకి పంపించాలని విపక్షాలు డిమాండ్

కేంద్ర మంత్రివర్గం ఆమోదించిన జమిలి ఎన్నికల రాజ్యాంగ సవరణ బిల్లును మంగళవారం లోక్ స‌భలో ప్రభుత్వం ప్రవేశపెట్టింది. ఒకే దేశం-ఒకే ఎన్నిక పేరుతో తీసుకురానున్న 129వ రాజ్యాంగ సవరణ బిల్లును కేంద్ర న్యాయశాఖ మంత్రి అర్జున్ రామ్ ఘర్వాల్ దిగువ సభలో ప్రవేశపెట్టారు. లోక్‌సభ, రాష్ట్రాల అసెంబ్లీ ఎన్నికలను ఏకకాలంలో నిర్వహించేందుకు గాను 129వ రాజ్యాంగ సవరణ బిల్లును కేంద్రం ప్రతిపాదించింది.

వన్ నేషన్ వన్ ఎలక్షన్ బిల్లును ఎన్డీయే ప్రభుత్వ భాగస్వామి టీడీపీ సమర్థించింది. లోక్‌సభ, అసెంబ్లీకి ఏకకాలంలో ఎన్నికల నిర్వహణకు తమ పార్టీ సమ్మతం తెలిపినట్లు కేంద్ర మంత్రి పెమ్మసాని చంద్రశేఖర్ సభలో తెలిపారు.

ఈ బిల్లుపై ఇండీ కూటమిలోని పార్టీలు అభ్యంతరం వ్యక్తం చేశాయి. కాంగ్రెస్ ఎంపీ మనీష్ తివారీ, సమాజ్ వాదీ పార్టీ ఎంపీ ధర్మేంద్ర యాదవ్ విమర్శలు గుప్పించారు. ప్రతిపాదిత బిల్లు లోక్‌సభ శాసన సామర్థ్యానికి మించినదని, దీనిని తక్షణమే ఉపసంహరించుకోవాలని మనీశ్ తివారీ కోరారు. నియంతృత్వ పోకడకు 129 వ రాజ్యాంగ సవరణ బిల్లు ప్రతిపాదన నిదర్శనమని ఎస్పీ ఎంపీ ధర్మేంద్ర యాదవ్ అన్నారు.

కాంగ్రెస్, సమాజ్‌వాదీ, తృణమూల్ కాంగ్రెస్, డీఎంకే, ఇండియన్ యూనియన్ ముస్లీం లీగ్(ఐయూఎంఎల్), శివసేన (యూబీటీ) బిల్లును వ్యతిరేకించాయి. బిల్లును జేపీసీకి పంపించాలని కాంగ్రెస్‌ నేత గౌరవ్‌ గొగోయ్‌ డిమాండ్‌ చేశారు.