శ్రీవారి సాల‌క‌ట్ల బ్రహ్మోత్సవాలకు గురువారం సాయంత్రం అంకురార్పణ జరగగా నేటి వారం సాయంత్రం 5.45 నుంచి 6 గంటల మధ్య ధ్వజారోహణ ఘట్టం నిర్వహించారు. మీన లగ్నంలో ధ్వజారోహణ ఘట్టంతో వైభవంగా బ్రహ్మోత్సవాలు ప్రారంభమయ్యాయి.
శ్రీదేవి, భూదేవి సమేత శ్రీమలయప్పస్వామి సమక్షంలో వేదపఠనం మధ్య మంగళవాద్యాలు మోగుతుండగా బంగారు ధ్వజస్తంభంపై గరుడధ్వజాన్ని ఎగురవేశారు. అర్చక స్వాములు ఈ ఘట్టాన్ని పూర్తి చేశారు. సకల దేవతలు, అష్టదిక్పాలకులను బ్రహ్మోత్సవాలకు ఆహ్వానించేందుకు ఈ కార్యక్రమం నిర్వహిస్తారు.
ఈ ఘట్టానికి ముందు బంగారు తిరుచ్చిపై శ్రీదేవి, భూదేవి సమేత శ్రీ మలయప్పస్వామివారితో పాటు పరివార దేవతలైన శ్రీ అనంత, గరుడ, చక్రత్తాళ్వార్‌, సేనాధిపతి వారిని, ధ్వజపటాన్ని మాడ వీధుల్లో ఊరేగించారు. ఈ కార్యక్రమంలో భక్తులు పెద్ద ఎత్తున పాల్గొన్నారు.
తిరుమల శ్రీశ్రీ‌శ్రీ పెద్ద జీయర్ స్వామి, తిరుమల శ్రీశ్రీ‌శ్రీ చిన్న జీయర్ స్వామి, ప్రధాన అర్చకులు, ముఖ్య అర్చకులు, ఆగమ సలహాదారులు, టీటీడీ ఈవో శ్రీ జె శ్యామలరావు సహా ఇతర అధికారులు ఈ కార్యక్రమంలో పాల్గొన్నారు.
