ఇజ్రాయెల్ సైన్యం వెస్ట్‌బ్యాంక్‌లోని క్వాబాటియాలో కీలక ఉగ్ర కమాండర్ షాదీ జక్రానేహ్‌ను మట్టుబెట్టింది.ముందుగా జెనిన్ సమీపంలో ఐడీఎఫ్ దళాలు కాల్పులు జరిపి జక్రానేహ్‌కు చెందిన నలుగురు గన్‌మెన్‌లను కాల్చి చంపాయి. ఉగ్రవాదులు ఎదురు కాల్పులకు తెగబడటంతో, డ్రోన్ల సాయంతో బాంబింగ్ చేసి ఉగ్రమూకలను ఇజ్రాయెల్ సైన్యం మట్టుబెట్టింది.
ఈ బాంబింగ్‌లో ఆయుధాలు కలిగిన ఓ కారును కూడా పేల్చి వేశారు. భారీగా మందుగుండు ధ్వంసమైంది. తాజా దాడిలో ఉగ్ర కమాండర్ షాదీ జక్రానేహ్ హతమైనట్లు ఐడీఎఫ్ ప్రకటించింది. వెస్ట్‌బ్యాంకులో దాడులకు షాదీ నేతృత్వం వహిస్తున్నట్లు ఇజ్రాయెల్ తెలిపింది. మరో ఏడుగురు ఉగ్రవాదులను అదుపులోకి తీసుకున్నారు.
లెబనాన్‌పై ఇజ్రాయెల్ సైన్యం దాడులు కొనసాగిస్తోంది. బుధవారం వెయ్యి రాకెట్లు ధ్వంసం చేసిన ఐడిఎఫ్, తాజాగా 100 రాకెట్ లాంఛర్లను ధ్వంసం చేశారు. మరోసారి ఇజ్రాయెల్ భీకర దాడులు ప్రారంభించినట్లు తెలుస్తోంది.
