వ్యోమగామి సునీతా విలియమ్స్ ను అంతరిక్ష కేంద్రానికి తీసుకెళ్ళిన బోయింగ్ స్టార్ లైనర్ స్పేస్ క్రాఫ్ట్ క్షేమంగా తిరిగి వచ్చింది. భారత కాలమానం ప్రకారం శనివారం ఉదయం 9:30 గంటలకు న్యూమెక్సికోలోని వైట్ సాండ్స్ స్పేస్ హార్బర్ లో దిగింది.
స్పేస్ స్టేషన్ నుంచి స్టార్ లైనర్ భూమికి చేరడానికి దాదాపు ఆరు గంటల సమయం పట్టిందని నాసా శాస్త్రవేత్తలు పేర్కొన్నారు. సునీతా విలియమ్స్ తో పాటు బుచ్ విల్ మోర్ లను తిరిగి తీసుకురావడం కుదరకపోవడంతో అక్కడే వదిలేసి వచ్చింది.
సాంకేతిక లోపాల కారణంగా వ్యోమగాముల భద్రతకు ప్రాధాన్యమిస్తూ స్పేస్ షిప్ ను ఖాళీగా తీసుకొచ్చింది. వారం రోజుల షెడ్యూల్డ్ టూర్ కోసం వెళ్లిన సునీతా విలియమ్స్, బుచ్ విల్ మోర్ లు తిరిగి రావడానికి వచ్చే ఏడాది వరకు వేచి ఉండాల్సి వస్తోంది.
బోయింగ్ స్టార్ లైనర్ ప్రయోగానికి తొలి నుంచి విఘ్నాలు ఎదురవుతూనే ఉన్నాయి. ప్రయోగానికి అన్నీ సిద్ధం చేసిన తర్వాత ప్రయాణం చివరి క్షణంలో పలుమార్లు వాయిదా పడింది.
ఈ ఏడాది జూన్ లో సునీతా విలియమ్స్, బుచ్ విల్ మోర్ లను అంతరిక్షానికిమోసుకెళ్లింది. వారం రోజుల తర్వాత తిరిగి బయలుదేరాల్సి ఉండగా సాంకేతిక సమస్య తలెత్తడంతో వ్యోమగాములను అక్కడే ఉంచి స్టార్ లైనర్ ను భూమిపై దించారు. వ్యోమగాములు మాత్రం వచ్చే ఏడాది ఫిబ్రవరిలో తిరిగిరానున్నారు.
