ఉత్తరప్రదేశ్‌లో ఘోర రోడ్డు ప్రమాదం జరిగింది. యూపీలోని షాజహాన్‌పుర్ జిల్లాలో ట్యాంకర్, ఆటో ఢీకొన్న ఘటనలో 12 మంది చనిపోయారు. తెల్లవారుజామున దట్టమైన పొగమంచువల్ల రోడ్డు సరిగా కనిపించకపోవడంతో ఈ ప్రమాదం (road accident) జరిగిందని పోలీసులు తెలిపారు. యూపీ పోలీసులు అందించిన సమాచారం మేరకు…
జలలాబాద్ నుంచి ఫరూఖాబాద్ వెళుతోన్న ఆటోను, ఓ ట్యాంకర్ ఢీకొట్టడంతో ఆటోలో ప్రయాణిస్తోన్న 12 మంది దుర్మరణం చెందారని పోలీసులు తెలిపారు. బరేలీ, ఫరూఖాబాద్ జాతీయ రహదారిపై ఈ ప్రమాదం జరిగింది. రోడ్డు ప్రమాద సమాచారం అందుకున్న పోలీసులు వెంటనే ఘటనా స్థలానికి చేరుకున్నారు. సహాయక చర్యలు చేపట్టారు. మృతుల్లో మహిళలు, చిన్నారులు ఎక్కువగా ఉన్నట్లు పోలీసులు తెలిపారు. రోడ్డు ప్రమాదంలో మరణించిన వారిని పోస్టుమార్టం రిపోర్టు కోసం సమీపంలోని ప్రభుత్వ ఆసుపత్రికి తరలించారు.
