ప్రకాశం జిల్లాలో కంప్రెస్డ్‌ బయో గ్యాస్‌ ప్లాంట్‌ నిర్మాణానికి మంత్రి నారా లోకేశ్ భూమి పూజ చేశారు. పీసీపల్లి మండలం దివాకరపల్లి సమీపంలో రిలయన్స్‌ సంస్థ ఏర్పాటు చేయనున్న ఈ ప్లాంట్‌కు శంకుస్థాపన జరిగింది. బయో ఫ్యూయల్‌ ఉత్పత్తిలో రాష్ట్రాన్ని అగ్రగామిగా నిలిపేందుకు ఈ ప్రాజెక్టు కీలకం.

ప్రాజెక్టు కోసం రిలయన్స్‌ సంస్థ రూ.65 వేల కోట్ల పెట్టుబడి తో 500 సీబీజీ ప్లాంట్లను ఏర్పాటు చేయనుంది. ఈ ప్లాంట్ల ఏర్పాటుతో సుమారు 2.5 లక్షల మందికి ఉపాధి అవకాశాలు దొరుకుతాయి. వ్యవసాయ వ్యర్థాలను ఉపయోగించి హరిత, పునరుత్పాదక విద్యుత్‌ ఉత్పత్తి కి ఈ ప్లాంట్లు దోహదపడతాయి. ప్రతీ సీబీజీ ప్లాంట్‌ రోజుకు 22 టన్నుల ఉత్పత్తి సామర్థ్యం కలిగి ఉండటంతో పాటు నిరుపయోగంగా ఉన్న దాదాపు 5 లక్షల ఎకరాల భూమిని ఎనర్జీ ప్లాంటేషన్‌ కోసం వినియోగిస్తారు. భూమి పూజ కార్యక్రమంలో మంత్రులు గొట్టిపాటి రవికుమార్‌, డోలా బాల వీరాంజనేయ స్వామి పాల్గొన్నారు.

నిరుపయోగంగా ఉన్న దాదాపు 5 లక్షల ఎకరాల భూమిని ఎనర్జీ ప్లాంటేషన్‌ కోసం ప్రభుత్వం వినియోగించనుంది. 2035 నాటికి కర్బన ఉద్గారాలను సున్నా స్థాయికి తీసుకురావడమే లక్ష్యంగా సంప్రదాయేతర ఇంధన వనరుల అభివృద్ధిని ప్రోత్సహిస్తున్నట్లు మంత్రి లోకేశ్‌ తెలిపారు.