విద్యార్థులకు అంతరిక్ష విజ్ఞానంపై అవగాహన కల్పించేందుకు భారత అంతరిక్ష పరిశోధన సంస్థ (ISRO) యువ  విజ్ఞాన కార్యక్రమం YUVIKA – YUva VIgyani KAryakram  కార్యక్రమం నిర్వహిస్తోంది. Young Scientist Programme పేరిట ఈ కార్యక్రమాన్ని నిర్వహిస్తున్నట్లు ఇస్రో వివరించింది.

ఈ ఏడాది చేపట్టబోయే YUVIKA కోసం  తొమ్మిదో తరగతి విద్యార్థుల నుంచి దరఖాస్తులు ఆహ్వానిస్తోంది. ఈ కార్యక్రమంలో భాగస్వాములయ్యే విద్యార్థులకు నేరుగా శాస్త్రవేత్తలతో మాట్లాడే అవకాశం కూడా కల్పించనున్నారు.

ప్రభుత్వ, ప్రైవేటు పాఠశాలల్లో తొమ్మిదో తరగతి అభ్యసించే  విద్యార్థులు ఈ కార్యక్రమానికి దరఖాస్తు చేసుకోవచ్చు. 8వ తరగతిలో సాధించిన మార్కులకు 50 శాతం వెయిటేజీ ఇవ్వడంతో పాటు  స్పేస్, సైన్సు క్లబ్‌ల్లో ఉంటే 5 శాతం, జిల్లా, రాష్ట్ర, జాతీయ స్థాయిలో సైన్స్‌ వ్యాసరచన, వక్తృత్వ పోటీల్లో ప్రతిభ కనబరిచి ఉంటే పది శాతం, ఎన్‌సీసీ, స్కౌట్స్‌ గైడుగా ఉంటే గ్రామీణ ప్రాంత విద్యార్థులకు 20 శాతం, పట్టణ ప్రాంతాల వారికి 5 శాతం వెయిటేజీ కల్పించనున్నారు.

 తొమ్మిదో తరగతి విద్యార్థులు మార్చి 23లోగా ఆన్‌లైన్‌ ద్వారా రిజిస్ట్రేషన్‌ చేసుకుని దరఖాస్తులు సమర్పించాలి. పరిశీలన అనంతరం ఏప్రిల్‌ 7న ఎంపికైన విద్యార్థుల జాబితాను ఇస్రో యువికా విభాగం విడుదల చేయనుంది.  మే 18 నుంచి విద్యార్థులను విడతల వారీగా ఆహ్వానిస్తారు. అదేనెల 19 నుంచి 30 వరకు యువికా-25 కార్యక్రమం నిర్వహించి 31న ముగింపు కార్యక్రమంలో ప్రతిభ ఆధారంగా బహుమతులు, ప్రశంసాపత్రాలు అందిస్తారు.

సూళ్లూరుపేట (ఏపీ), హైదరాబాద్‌ (తెలంగాణ), బెంగళూరు (కర్ణాటక), డెహ్రడూన్‌ (ఉత్తరాఖండ్‌), తిరువనంతపురం (కేరళ), షిల్లాంగ్‌ (మేఘాలయ), అహ్మదాబాద్‌ (గుజరాత్‌) లో ఈ కార్యక్రమాన్ని నిర్వహిస్తారు.

యువికాకు  ఎంపికైన విద్యార్థులకు ఇస్రో అన్ని వసతులు సమకూర్చనుందది.  ప్రయాణం, భోజన వసతి ఉచితంగా అందజేయడంతో పాటు ఈ ఏడాది మే నెలలో 14 రోజులపాటు ఇస్రో అంతరిక్ష కేంద్రాలకు తీసుకెళ్ళనుంది. సైన్సుకు సంబంధించిన విశేషాలు తెలియజేయడంతో పాటు రాకెట్‌ ప్రయోగాల పనితీరు గురించి విద్యార్థులకు వివరిస్తారు.