దేశంలో చొరబడేందుకు ప్రయత్నించిన ఇద్దరు తీవ్రవాదులను భద్రతా బలగాలు ముట్టుబెట్టాయి. జమ్ముకశ్మీర్‌లో అక్రమచొరబాటుకు యత్నించిన ఇద్దరు ఉగ్రవాదులను భద్రతాబలగాలు పసిగట్టాయి. గురువారం రాత్రి పూంచ్‌ సెక్టార్‌లోని సరిహద్దు నియంత్రణ రేఖ వద్ద ఇద్దరు తీవ్రవాదులు దేశంలోకి చొరబడేందుకు ప్రయత్నించారు. వారిని అడ్డుకునేందుకు భద్రతా బలగాలు యత్నించాయి. ఈ సందర్భంగా ఇరుపక్షాల మధ్య భారీగా కాల్పులు జరిగాయి.
ఈ క్రమంలో భారత సైన్యానికి చెందిన వైట్‌ నైట్‌ కార్ప్స్‌ జరిపిన కాల్పుల్లో ఇద్దరు ఉగ్రవాదులు హతమయ్యారు. ఎల్‌ఓసీ వద్ద రాత్రంతా కాల్పులు జరిగాయని, ఘటనా స్థలంలో భారీగా ఆయుధాలను స్వాధీనం చేసుకున్నట్లు వైట్‌ నైట్‌ కార్ప్స్‌ ఎక్స్‌ వేదికగా తెలిపింది.
గత నెలలో కుల్గామ్‌ పరిధిలో జరిగిన ఎన్‌కౌంటర్‌లో ఐదుగురు ఉగ్రవాదులు చనిపోయారు. డిసెంబర్‌ 18న కుల్గామ్‌ జిల్లాలోని బెహిబాగ్‌ ప్రాంతంలో టెర్రరిస్టులు ఉన్నారనే సమాచారంలో భద్రతా బలగాలు గాలింపు చర్యలుచేపట్టాయి. ఆ సమయంలో ఉగ్రవాదులు, భద్రతా దళాలకు మధ్య జరిగిన కాల్పుల్లో ఐదుగురు ముష్కరులు ప్రాణాలు కోల్పోయారు.
