భారతదేశంలో స్లీపర్ సెల్ నిర్వహిస్తున్నాడని అనుమానిస్తున్న మహమ్మద్ జక్రియా (55) అనే పాకిస్తాన్ జాతీయుడిని ఎన్ఐఏ అధికారులు అరెస్ట్ చేసారు. జక్రియాకు పాకిస్తాన్ కేంద్రంగా పనిచేస్తున్న ఉగ్రవాద సంస్థతో సంబంధాలున్నాయని ఎన్ఐఏ భావిస్తోంది. అతన్ని జనవరి 25న శ్రీలంకకు వెళ్ళేందుకు ప్రయత్నిస్తుండగా చెన్నై అంతర్జాతీయ విమానాశ్రయంలో పట్టుకున్నారు.

పాకిస్తాన్ నుంచి నడుస్తున్న ఒక ఉగ్రవాద సంస్థకు భారతదేశంలో ఆపరేషన్స్ హెడ్‌గా జక్రియా వ్యవహరిస్తున్నాడని సమాచారం. తెలంగాణ, ఆంధ్రప్రదేశ్ రాష్ట్రాల్లో స్లీపర్ సెల్స్‌ను అతను సమన్వయం చేస్తున్నాడని తెలుస్తోంది. దాంతో అతనిపై కొంతకాలంగా నిఘా పెట్టారు.

జక్రియా పనిచేస్తున్న ఉగ్రవాద సంస్థ నాయకుడు ఇటీవల చనిపోయాడు. దాంతో ఆ సంస్థ శ్రీలంకలో ఒక రహస్య సమావేశం ఏర్పాటు చేసింది. దానికి వెడుతుండగానే జక్రియా పట్టుబడ్డాడని తెలుస్తోంది. ఉగ్రసంస్థలకు ఆర్థిక సహకారం, యువతరాన్ని అతివాదులుగా మార్చడం, పాకిస్తాన్‌తో సంబంధాలు వంటి పలు ఆందోళనకర విషయాలు జక్రియా అరెస్ట్‌తో బైటపడ్డాయి.

మహమ్మద్ జక్రియా పాకిస్తానీయుడు. గత 25 సంవత్సరాలుగా అతను భారత్‌లోనే ఉంటున్నాడు. మొదట ఆంధ్రప్రదేశ్‌లోని గుంటూరులో ఉండేవాడు. తర్వాత తెలంగాణలోని వరంగల్ జిల్లా హన్మకొండలో స్థిరపడ్డాడు. రాయల్ బావర్చి బిర్యానీ పేరిట ఒక హోటల్ నిర్వహిస్తున్నాడు. అతని కోవర్ట్ ఉగ్రవాద కార్యకలాపాలకు ఆ హోటల్ ఒక ముసుగు మాత్రమే అని అధికారులు అనుమానిస్తున్నారు. వరంగల్‌లో ఇస్లాంలోకి మత మార్పిడులను పెంచడంలో అతని ప్రమేయముంది.  

జక్రియాకు పాకిస్తానీ హ్యాండ్లర్లతో ప్రత్యక్ష సంబంధాలు ఉన్నాయని తెలుస్తోంది. ఎన్‌క్రిప్టెడ్ కమ్యూనికేషన్ ఛానెల్స్ ద్వారా వారితో మాట్లాడుతుండే వాడు. అవసరమైన రవాణా సదుపాయాలు సమన్వయం చేసేవాడు. హవాలా ద్వారా ఆర్థిక లావాదేవీలు నిర్వహించేవాడు. స్థానిక యువతరాన్ని లక్ష్యంగా చేసుకుని వారిని ఇస్లామిక్ అతివాదులుగా మార్చి ఉగ్రసంస్థలోకి రిక్రూట్ చేసేవాడనీ తెలుస్తోంది.  

వరంగల్‌లోని జక్రియా నివాసంలో సోదాలు నిర్వహించిన భద్రతా బలగాలకు పేలుడు పదార్ధాలు, ఆయుధాలు, పెద్దసంఖ్యలో నకిలీ గుర్తింపు పత్రాలు దొరికాయి. దాంతో జక్రియా భారత్‌లో పేలుళ్ళకు కుట్రలు పన్నుతున్నాడన్న ఆందోళనలు వ్యక్తమయ్యాయి.  

జక్రియా అరెస్టుతో స్లీపర్ సెల్ నెట్‌వర్క్ తెలుగు రాష్ట్రాల్లో ఎంతగా విస్తరించిందో అర్ధమవుతోంది. తెలంగాణ, ఆంధ్రప్రదేశ్, తమిళనాడు రాష్ట్రాల్లో అలెర్ట్‌లు జారీచేసారు. ఉగ్రవాద మాడ్యూల్‌ను కనుగొని దాన్ని ఛేదించడానికి రా, ఐబీ, రాష్ట్రాల పోలీస్ విభాగాలు, ఇతర నిఘా విభాగాలు కలిసి సమన్వయంతో ప్రయత్నిస్తున్నాయి.