విశాఖ ఉక్కు పరిశ్రమను ప్రైవేటీకరణ చేయాలనే ఆలోచన కేంద్రానికి లేదని మంత్రి కుమారస్వామి స్పష్టం చేశారు. 2014 నుంచి విశాఖ ఉక్కు పరిశ్రమ నష్టాల్లో నడుస్తోందని, జీతాలు కూడా చెల్లించే పరిస్థితిలో లేదని, 2021లో ప్రైవేటీకరణ చేయాలని కేంద్రం భావించినట్లు కేంద్ర ఉక్కు మంత్రి కుమారస్వామి వెల్లడించారు. ఇటీవల విశాఖ ఉక్కు పరిశ్రమకు కేంద్ర ప్రభుత్వం రూ.11400 కోట్లు విడుదల చేసిందని ఆయన గుర్తుచేశారు.

విశాఖ ఉక్కుకు సొంత గనులు కేటాయించాలని, సెయిల్‌లో విలీనం చేయాలని కార్మికులు, ఉద్యోగులు కేంద్ర మంత్రిని కోరారు. సెయిల్‌లో విలీనం చేసే అంశాన్ని పరిశీలిస్తామన్నారు. సెయిల్ అనుమతి అభిస్తేనే ఇది సాధ్యం అవుతుందన్నారు.

కేంద్రం ప్రకటించిన ప్యాకేజీలో ముందుగా కార్మికులు, ఉద్యోగులకు చెల్లించాల్సిన బకాయిలు చెల్లిస్తామని కేంద్ర సహయమంత్రి శ్రీనివాసరాజు వెల్లడించారు. 2030 నాటికి దేశంలో 300 మిలియన్ టన్నుల ఉక్కు ఉత్పత్తి చేయాలన్న ప్రధాని మోదీ సంకల్పం మేరకు వచ్చే ఆగష్టు నాటికి విశాఖ ఉక్కు పరిశ్రమ పూర్తి స్థాయిలో ఉత్పత్తి జరుగుతుందని ఆయన ఆకాంక్షించారు. ఉక్కు మంత్రి కుమారస్వామి, సహాయమంత్రి శ్రీనివాసరాజు విశాఖ ఎంపీ భరత్ విశాఖ ఉక్కు కర్మాగారాన్ని సందర్శించి మీడియా సమావేశం ఏర్పాటు చేశారు. కార్మికులతో మాట్లాడి వారి ఇబ్బందులను తెలుసుకున్నారు.

విశాఖ ఉక్కు పరిశ్రమలో ప్రస్తుతం ఒక ఫర్నేస్ మాత్రమే పనిచేస్తోందని అధికారులు కేంద్ర మంత్రి దృష్టికి తీసుకెళ్లారు. ఉద్యోగులకు అక్టోబరు నుంచి జీతాల బకాయిలున్నాయన్నారు. సంస్థ దాదాపు 18 వేల కోట్ల నష్టాల్లో ఉన్నట్లు కేంద్ర మంత్రికి తెలియజేశారు. కేంద్రం ప్రకటించిన ప్యాకేజీ ఏ విధంగా సద్వినియోగం చేసుకోవాలనే అంశంలో కేంద్ర మంత్రులు పలు సూచనలు చేశారు.