డీజీపీగా హరీశ్ కుమార్ గుప్తాను నియమిస్తూ ఏపీ ప్రభుత్వం ఉత్తర్వులు జారీ చేసింది. ప్రస్తుత డీజీపీ ద్వారకా తిరుమలరావు ఈ నెల 31న పదవీ విరమణ చేయనున్నారు. ప్రస్తుతం విజిలెన్స్ అండ్ ఎన్‌ఫోర్స్‌మెంట్ విభాగం డైరెక్టర్ జనరల్‌ గా హరీశ్ కుమార్ బాధ్యతలు నిర్వహిస్తున్నారు. హరీశ్ కుమార్ కు డీజీపీగా అదనపు బాధ్యతలు అప్పగిస్తూ రాష్ట్ర ప్రభుత్వ ప్రధాన కార్యదర్శి కె. విజయానంద్ ఉత్తర్వులు జారీ చేశారు.
సార్వత్రిక ఎన్నికల సమయంలో కేంద్ర ఎన్నికల సంఘం అప్పటి డీజీపీ కేవీ రాజేంద్రనాథ్‌రెడ్డిని తప్పించి హరీశ్ కుమార్ గుప్తాకు బాధ్యతలు అప్పగించింది. దీంతో ఎన్నికల సమయం నుంచి కొత్త ప్రభుత్వం ఏర్పడే వరకు ఆయన డీజీపీగా బాధ్యతలు నిర్వహించారు.
అయితే కూటమి ప్రభుత్వం సీనియారిటీకి ప్రాధాన్యం ఇస్తూ ద్వారకా తిరుమలరావును డీజీపీగా నియమించింది.
హరీశ్ కుమార్ గుప్తా 1992 బ్యాచ్‌కు చెందిన ఐపీఎస్‌ అధికారి. హోం శాఖ ముఖ్య కార్యదర్శిగా, జైళ్ల శాఖ డీజీగా, ఎన్నికల సమయంలో డీజీపీగానూ పనిచేసిన అనుభవం హరీశ్ కుమార్ గుప్తాకు ఉంది.
ద్వారక తిరుమలరావు, డీజీపీగా రిటైర్ అయినప్పటికీ ఆర్టీసీ వైస్ చైర్మన్, మేనిజింగ్ డైరక్టర్ పదవిలో కొనసాగుతారని రాష్ట్రప్రభుత్వం మరో జీవో లో పేర్కొంది.
