ప్రయాగరాజ్‌లోని త్రివేణీ సంగమం దగ్గర గత అర్ధరాత్రి దాటాక ఇవాళ తెల్లవారడానికి ముందు జరిగిన తొక్కిసలాటలో 30మంది ప్రాణాలు కోల్పోయారు, మరో 60 మంది గాయపడ్డారని పోలీసు శాఖ ధ్రువీకరించింది. మృతుల్లో 25మందిని గుర్తించామని డీఐజీ వైభవ్ కృష్ణ తెలియజేసారు.
మృతుల్లో నలుగురు కర్ణాటకకు చెందిన వారు, ఒకరు అస్సాం, ఒకరు గుజరాత్ నుంచి వచ్చినవారు అని డీఐజీ చెప్పారు. ప్రస్తుతం 36మంది స్థానిక వైద్యకళాశాలలో చికిత్స పొందుతున్నారని వివరించారు.
‘‘మహామండలేశ్వరులు. సాధుసంతులు, అఖాడాల ప్రతినిధులు తమ పవిత్ర స్నానాలను కొంత ఆలస్యంగా చేయాలని ముఖ్యమంత్రి యోగి ఆదిత్యనాథ్ కోరారు. దానికి వారు ఒప్పుకున్నారు. వారి అమృత స్నానాలు సురక్షితంగా పూర్తయ్యాయి’’ అని డీఐజీ వెల్లడించారు.
దుర్ఘటన వివరాలను డీఐజీ వైభవ్ కృష్ణ ఈవిధంగా వివరించారు. ‘‘గత రాత్రి ఒంటిగంట, రెండు గంటల మధ్యలో అంటే బ్రహ్మముహూర్తానికి ముందు అఖాడా మార్గంలో చాలా పెద్ద గుంపు జమ అయింది. ఆ గుంపు వల్ల అక్కడున్న బ్యారికేడ్లు విరిగిపోయాయి. అప్పటికే అటుపక్కన భక్తులు పవిత్రస్నానాల కోసం ఎదురుచూస్తూ ఉన్నారు. వారి మీదకు ఈ గుంపు దూసుకునిపోయింది. దాంతో ప్రమాదం జరిగింది. సుమారు 90మందిని ఆంబులెన్సుల్లో ఆస్పత్రికి తరలించారు. కానీ దురదృష్టవశాత్తు 30మంది ప్రాణాలు కోల్పోయారు’’ అని చెప్పారు.
రేపు ఢిల్లీలో అసెంబ్లీ ఎన్నికల ప్రచారంలో పాల్గొనడానికి వెళ్ళవలసి ఉన్న యూపీ ముఖ్యమంత్రి తన ఢిల్లీ పర్యటనను వాయిదా వేసుకున్నారు.
కుంభమేళాలో నాలుగు ప్రధానమైన రోజుల్లో ఇవాళ రెండవది. మౌని అమావాస్య పర్వదినం సందర్భంగా ఇవాళ సాయంత్రానికి 5కోట్ల 71లక్షల మందికి పైగా శ్రద్ధాళువులు అమృత స్నానం ఆచరించారని ఉత్తరప్రదేశ్ సమాచార శాఖ ప్రకటించింది.
