హిందువుల భక్తిశ్రద్ధలకు ప్రత్యక్ష నిదర్శనంగా త్రివేణీ సంగమంలో భక్తజన సముద్రం బారులు తీరిన మహాద్భుత ఘట్టం మహాకుంభమేళా. తీర్థరాజం ప్రయాగరాజ్‌లో కుంభమేళా సమయంలో పవిత్ర స్నానాలు ఆచరించడం జన్మకు సార్థకమని భారతీయుల సనాతన విశ్వాసం. అలాంటి సందర్భంలో అపురూపమైన దృశ్యం ఆవిష్కృతమైంది.

కుంభమేళాలో పవిత్రస్నానం చేయాలని 92ఏళ్ళ తల్లి కోరుకుంది. ఆమె కోరికను 65ఏళ్ళ కొడుకు తీర్చాడు. ఒక ఎడ్లబండిలో ఆమెను ఎక్కించుకుని తనే స్వయంగా నడిపించుకుంటూ ప్రయాగ తీసుకుని వెడుతున్నాడు. ఆ సంఘటన రామాయణంలోని శ్రవణ కుమారుడి మాతృభక్తిని తలపిస్తోంది.

చౌధరీ సుదేశ్ పాల్ మాలిక్ (65) ఉత్తరప్రదేశ్‌లోని ముజఫర్‌నగర్‌ నివాసి. పాతికేళ్ళ క్రితం ఆయన మోకాళ్ళు దెబ్బతిన్నాయి. కొన్నాళ్ళ వైద్యం తర్వాత ఆయన సమస్య నయమైంది. తల్లి ఆశీర్వాద బలం వల్లనే తను కోలుకుని నడవగలుగుతున్నానని సుదేశ్ పాల్ విశ్వాసం. తల్లి ‌ఋణం తీర్చుకోవాలన్నది ఆయన కోరిక.

సుదేశ్ పాల్ మాలిక్ తల్లి వయసు 92 సంవత్సరాలు. వయసు పెద్దరికం, శారీరకంగా బలహీనంగా ఉన్నా ఆమెకు  తన ఆచార సంప్రదాయాలపై భక్తిశ్రద్ధలు ఎంతమాత్రం తగ్గలేదు. మహాకుంభమేళాలో పవిత్ర స్నానం చేయాలని ఆమె కోరుకుంది. దాన్ని తనే స్వయంగా తీర్చాలని భావించాడు సుదేశ్ పాల్. ఒక ఎడ్లబండి మీద తల్లిని కూర్చోబెట్టి ఆ బండిని తనే లాగుతూ ప్రయాగరాజ్‌కు బయల్దేరాడు. ‘త్రివేణీ మయ్యా కీ జయ్’, ‘త్రివేణీ మహాప్రయాగ్‌ కీ జయ్’ అని నినాదాలు చేస్తూ ప్రయాణం ప్రారంభించారా తల్లీ కొడుకులు.

ముజఫర్‌నగర్ నుంచి ప్రయాగరాజ్‌కు 780 కిలోమీటర్ల దూరం. సగటున రోజుకు 50 కిలోమీటర్లు ప్రయాణించినా, వారు గమ్యస్థానాన్ని చేరుకోడానికి కనీసం 15 రోజులు పడుతుంది. నిన్న మంగళవారం బులంద్‌షహర్‌ వద్ద ఆ తల్లీ కొడుకులను గమనించినవారెవరో వీడియో తీసారు. దాన్ని ‘ఎక్స్’లో పోస్ట్ చేస్తే క్షణాల్లో వైరల్ అయిపోయింది. ఆ తల్లి భక్తిశ్రద్ధలను, ఆ కొడుకు మాతృభక్తినీ కొనియాడని వారు లేరు.