ఆంధ్రప్రదేశ్, తెలంగాణలోని ఎమ్మెల్సీ స్థానాలకు ఎన్నిక‌లు జరగనున్నాయి. ఈ మేరకు ఎన్నికల సంఘం షెడ్యూల్ విడుద‌ల చేసింది. ఫిబ్ర‌వ‌రి 3న ఎన్నిక‌ల నోటిఫికేష‌న్, ఫిబ్ర‌వ‌రి 27న పోలింగ్ నిర్వహించనున్నట్లు ఎన్నికల సంఘం తెలిపింది. మార్చి 3న ఓట్ల లెక్కింపు చేప‌డతారు. ఈ మేర‌కు కేంద్ర ఎన్నిక‌ల సంఘం షెడ్యూల్‌ రిలీజ్ చేసింది.

తెలుగు రాష్ట్రాల్లో మూడు చొప్పున ఎమ్మెల్సీ స్థానాల్లో ఎన్నిక‌లు జ‌ర‌గ‌నున్నాయి. పట్టభద్రలు, ఉపాధ్యాయ స్థానాలకు ఈ ఎన్నికలు జరుగుతున్నాయి.

తెలంగాణ‌లో మెదక్‌-నిజామాబాద్‌-ఆదిలాబాద్‌-క‌రీంన‌గ‌ర్ ఉపాధ్యాయ నియోజ‌క వ‌ర్గానికి ఎన్నిక‌లు నిర్వ‌హించ‌నున్నారు.ఈ పట్టభద్రుల ఎమ్మెల్సీ స్థానానికి టి. జీవన్ రెడ్డి ప్రస్తుతం ప్రాతినిధ్యం వహిస్తున్నారు. ఇదే స్థానంలో ఉపాధ్యాయ ఎమ్మెల్సీ ఎన్నిక‌లు కూడా జ‌ర‌గ‌నుండగా కుర్రా రఘుమోత్తమరెడ్డి ప్రస్తుతం ఎమ్మెల్సీ గా ఉన్నారు. వ‌రంగ‌ల్‌-ఖ‌మ్మం-న‌ల్గొండ ఉపాధ్యాయ నియోజ‌కవ‌ర్గానికి కూడా ఎన్నిక‌లు నిర్వ‌హించ‌నున్నారు. ఈ స్థానానికి గతంలొ నర్సిరెడ్డి ఎన్నికయ్యారు. వీరంతా ఈ ఏడాది మార్చి 29న పదవీ విరమణ చేయనున్నారు.

ఏపీలోని ఉమ్మ‌డి ఉభ‌య‌గోదావరి, కృష్ణా-గుంటూరు ప‌ట్ట‌భ‌ద్రుల నియోజ‌కవ‌ర్గాల‌కు ఎన్నిక‌లు జ‌ర‌గ‌నున్నట్లు ఎన్నికల సంఘం తెలిపింది. శ్రీకాకుళం-విజ‌య‌న‌గ‌రం-విశాఖ‌ప‌ట్నం ఉపాధ్యాయ నియోజ‌క వ‌ర్గానికి ఎన్నిక‌లు నిర్వ‌హించేందుకు ఈసీ షెడ్యూల్ ప్రకటించింది. ఈ స్థానాలకు ప్రస్తుతం ప్రాతినిధ్యం వహిస్తున్న ఇల్లా వెంకటేశ్వరరావు, కేఎస్ లక్ష్మణరావు, పాకలపాటి రఘువర్మ ఈ ఏడాది మార్చి 29న పదవీ విరమణ చేస్తారు.