వాట్సాప్ గవర్నెన్స్‌పై ముఖ్యమంత్రి నారా చంద్రబాబు నాయుడు ఇవాళ (బుధవారం) సచివాలయంలో సమీక్ష నిర్వహించారు. రాష్ట్రంలో వాట్సాప్ గవర్నెన్స్ సేవలను ప్రభుత్వం రేపటి నుంచి అందుబాటులోకి తీసుకువస్తోంది. మొదటి విడతగా పౌరులకు 161 సేవలను ప్రభుత్వం అందించనుంది. వాటిలో దేవదాయ, ఎనర్జీ, ఏపీఎస్ ఆర్టీసీ, రెవెన్యూ, అన్నక్యాంటీన్, సీఎంఆర్ఎఫ్, మున్సిపల్ వంటి వివిధ శాఖలు అందిస్తున్న సేవలు ఉన్నాయి. రెండవ విడతలో మరిన్ని సేవలను ప్రభుత్వం అందుబాటులోకి తేనుంది.

దేశంలోనే మొదటి సారి వాట్సాప్ గవర్నెన్స్ విధానాన్ని రాష్ట్రంలో ప్రవేశపెడుతున్నామని, ధ్రువపత్రాల కోసం పౌరులు ప్రభుత్వ కార్యాలయాల చుట్టూ తిరిగే విధానానికి ఇక స్వస్తి పలుకుతామనీ ముఖ్యమంత్రి అన్నారు. అదే సమయంలో పౌరుల సమాచారం సైబర్ నేరగాళ్ళకు చిక్కకుండా జాగ్రత్తలు తీసుకోవాలన్నారు. ఫోరెన్సిక్, సైబర్ సెక్యూరిటీని బలోపేతం చేయాలని సూచించారు. వాట్సాప్ ద్వారా సేవలు అందించేందుకు రాష్ట్ర ప్రభుత్వం 2024 అక్టోబర్ 22న ‘మెటా’ సంస్థతో ఒప్పందం చేసుకుంది.

వాట్సాప్ గవర్నెన్స్‌ సేవలను ఐటీ, విద్యా శాఖ మంత్రి నారా లోకేష్ రేపు అధికారికంగా ప్రారంభిస్తారు. దానికి ముందు ఇవాళ సీఎం చంద్రబాబు సమీక్ష నిర్వహించారు. ఆ సమీక్షలో రాష్ట్ర ప్రధాన కార్యదర్శి కె.విజయానంద్‌, ఇతర ఉన్నతాధికారులు పాల్గొన్నారు.