ఇస్లామిక్ ఉగ్రవాద సంస్థ ఐఎస్ఐఎస్‌తో సంబంధాలు ఉన్నాయన్న అనుమానంతో అల్ఫాజిద్ అనే వ్యక్తిని జాతీయ దర్యాప్తు సంస్థ ఎన్ఐఏ అరెస్ట్ చేసింది. తమిళనాడు రాజధాని చెన్నయ్‌లోని పురసైవాక్కం ప్రాంతంలో ఇవాళ జరిపిన సోదాల్లో భాగంగా ఎన్ఐఏ అల్పాజిద్‌ను అరెస్ట్ చేసింది.
తమిళనాడులో ఐఎస్ఐఎస్ మాడ్యూల్‌ గురించిన సమాచారం ఆధారంగా కేంద్ర దర్యాప్తు సంస్థ ఆ రాష్ట్రంలో ఇవాళ 20 ప్రదేశాల్లో సోదాలు నిర్వహించింది. అతివాద ప్రబోధాలతో యువతను ఆకర్షించి అంతర్జాతీయ ఉగ్రవాద సంస్థ ఐఎస్ఐఎస్‌లో చేర్చడానికి తమిళనాడులో పలువురు వ్యక్తులు క్రియాశీలంగా పనిచేస్తున్నారని ఎన్ఐఏకు కేంద్రీయ నిఘా సంస్థల నుంచి కచ్చితమైన సమాచారం అందింది. దాని ఆధారంగా ఈ సోదాలు చేపట్టింది.
ఆ ఆపరేషన్‌లో భాగంగా ఎన్ఐఏ తిరుముల్లైవసల్ గ్రామంలో ఫాజిద్, సాదిక్ అనే ఇద్దరు అనుమానితుల ఫ్లాట్లు, ఇతర ఆస్తులపై సోదాలు నిర్వహించింది. అటువంటి సోదాలే పురసైవాక్కం, తదితర చెన్నయ్ నగర శివారు ప్రాంతాల్లో కూడా నిర్వహించారు.
భారతదేశపు అంతర్గత భద్రతకు ముప్పుగా పరిణమించగల స్లీపర్ సెల్స్‌ను, ఐఎస్ఐఎస్ ఉగ్రవాదులను పట్టుకోడానికి ఎన్ఐఏ ప్రయత్నిస్తోంది.
