జనవరి 31న సెమీ ఫైనల్ మ్యాచ్

మహిళల వరల్డ్‌ కప్ ‌అండర్-19 T20 పోటీల్లో భాగంగా భారత అమ్మాయిలు వరుస విజయాలు సాధిస్తున్నారు. సూపర్ సిక్స్‌ దశలో భాగంగా రెండో మ్యాచ్‌లోనూ భారత్ గెలిచింది. కౌలాలంపూర్ వేదికగా నేడు స్కాట్లాండ్‌ తో జరిగిన మ్యాచ్ లో భారత్‌ 150 పరుగులు తేడాతో విజయం సాధించింది.
టాస్ నెగ్గిన స్కాట్లాండ్ ఫీల్డింగ్ ఎంచుకుంది. తొలుత బ్యాటింగ్‌ చేసిన భారత్ నిర్ణీత 20 ఓవర్లలో వికెట్ నష్టానికి 208 పరుగులు చేసింది.

భారత్ ఓపెనర్లు కమలిని, గొంగడి త్రిష పరుగుల వరద సృష్టించారు. త్రిష, 59 బంతుల్లో 13 ఫోర్లు, 4 సిక్స్‌లు బాది శతకం సాధించింది. కేవలం 53 బంతుల్లోనే శతకం చేసింది. అండర్-19 టీ20ల్లో తొలి సెంచరీ చేసిన బ్యాటర్‌గా త్రిష రికార్డు సృష్టించింది. కమలిని(51) ఔటైనా త్రిష, సానికా(29) పరుగులు వరద కొనసాగించారు.

స్కాట్లాండ్‌ లక్ష్య ఛేదనలో 14 ఓవర్లలో 58 పరుగులు మాత్రమే చేయగల్గింది. ఓపెనర్లు పిప్పా (12), వాల్‌సింగమ్‌ (12), పిప్పా స్ప్రౌల్ (11) మినహా మిగతా వారు ఘోరంగా వెనుతిరిగారు. భారత్ 150 పరుగుల తేడాతో విజయం సాధించింది.

భారత్‌ బౌలర్లలో శుక్ల నాలుగు వికెట్లు తీయగా, వైష్ణవి శర్మ, త్రిష చెరో మూడు వికెట్లు పడగొట్టారు.

ఈ టోర్నీలో భాగంగా జనవరి 31న సెమీ ఫైనల్ మ్యాచ్‌‌లు జరగనున్నాయి.