మ‌హా కుంభమేళాకు ప్ర‌త్యేక బ‌స్సు సర్వీసులు న‌డ‌ప‌నున్న‌ట్లు ఏపీఎస్ఆర్‌టీసీ వెల్లడించింది. విజ‌య‌వాడ నుంచి ఈ సర్వీసులు నడపనున్నట్లు ఎన్టీఆర్ జిల్లా జిల్లా ప్రజార‌వాణా అధికారి ఎంవై దానం తెలిపారు.

ప్ర‌యాగ‌రాజ్‌ కుంభమేళాతో పాటు వార‌ణాసి, అయోధ్య పుణ్య‌క్షేత్రాల‌ను ద‌ర్శించుకునేలా సర్వీసులు నడపనున్నారు. దాదాపు 3,600 కిలోమీట‌ర్లు, మొత్తం 8 రోజుల పాటు యాత్ర సాగనుంది. ఫిబ్ర‌వ‌రి 1 నుంచి 8 వ‌ర‌కు యాత్రను షెడ్యూల్ ఆర్టీసీ అధికారులు ప్లాన్ చేశారు.

విజ‌య‌వాడ బస్టాండ్ నుంచి ఫిబ్ర‌వ‌రి 1న ఉద‌యం ప్ర‌త్యేక బ‌స్సులు బ‌య‌ల్దేరుతాయి.ఫిబ్రవరి 2న సాయంత్రం ప్ర‌యాగ‌రాజ్‌కు చేరుకుంటాయి.3న ప్ర‌యాగ‌రాజ్‌లోనే బ‌స చేసి 4న రాత్రి నుంచి అయోధ్య‌కు ప్ర‌యాణం ప్రారంభిస్తారు. 5న ఉద‌యం అయోధ్య‌కు చేరుకుని, బాల రాముడి ద‌ర్శ‌నం అనంతరం రాత్రికి కాశీకి ప్రయాణం ఉంటుంది.
6న వార‌ణాసికి చేరుకుని రాత్రికి అక్క‌డే బ‌స చేసి 7న ఉద‌యం వార‌ణాసి నుంచి బ‌స్సులు బ‌య‌ల్దేరుతాయి.
8 తేదకి బ‌స్సులు విజ‌య‌వాడ‌కు చేరుకుంటాయి.

ఈ యాత్రకు సంబంధించి ప్ర‌త్యేక బ‌స్సులకు గాను ఛార్జీలు ఇలా..

సూప‌ర్ ల‌గ్జ‌రీ సర్వీసు- రూ.8వేలు
స్టార్ లైన‌ర్ నాన్ ఏసీ స్లీప‌ర్‌ సర్వీసు- రూ.11వేలు
వెన్నెల ఏసీ స్లీప‌ర్‌ సర్వీసు- రూ.14,500

ఈ యాత్ర ప్ర‌త్యేక బ‌స్సుల్లో పిల్ల‌ల‌కు, పెద్ద‌ల‌కు ఛార్జీలు ఒకేలా ఉంటాయ‌ని ఆర్‌టీసీ అధికారులు స్పష్టం చేశారు. భోజ‌నం, వ‌స‌తి, ఇత‌ర ఖ‌ర్చుల‌ను ప్ర‌యాణికులే భ‌రించాల్సి ఉంటుంద‌ని తెలిపారు. యాత్రకు వెళ్ల‌ద‌ల‌చిన వారు 35, 29 మంది భ‌క్తులు స‌మూహంగా వ‌స్తే ప్ర‌త్యేక బ‌స్సులు ఏర్పాటు చేస్తామ‌న్నారు.

సర్వీసు రిజ‌ర్వేష‌న్ కోసం ఆన్‌లైన్‌, ఆర్టీసీ టికెట్ బుకింగ్ ఏజెంట్లు, స‌మీప బస్ స్టేష‌న్ల‌లో సంప్ర‌దించాల‌ని సూచించారు. 8074298487, 0866 2523926, 0866 2523928 నంబ‌ర్ల‌కు ఫోన్‌ చేసి మరిన్ని వివరాలు తెలుసుకోవచ్చు.
రాజ‌మ‌హేంద్ర‌వ‌రం, కొవ్వూరు నుంచి కూడా బ‌స్సులు ఏర్పాటు చేసిన‌ట్లు అధికారులు చెప్పారు.