ఆంధ్రప్రదేశ్‌లో ఫిబ్రవరి 1 నుంచి కొత్త రిజిస్ట్రేషన్ విలువలు అమల్లోకి రానున్నాయి. ఈ విషయాన్ని రాష్ట్ర రెవెన్యూ, రిజిస్ట్రేషన్ అండ్ స్టాంప్స్ శాఖా మంత్రి అనగాని సత్యప్రసాద్ వెల్లడించారు. రిజిస్ట్రేషన్ విలువల నుంచి రాజధాని గ్రామాలకు మినహాయింపు ఉందన్నారు. అమరావతి ప్రాంత పరిధిలోని గ్రామాల్లో రిజిస్ట్రేషన్ విలువలు యథావిథిగా ఉంటాయని తెలిపారు.
గ్రోత్ సెంటర్లుగా ఉండి, మార్కెట్ విలువ 10 రెట్లు ఎక్కువ ఉన్న ప్రాంతాల్లో రిజిస్ట్రేషన్ విలువలు పెరుగుతాయన్నారు. కొన్ని ప్రాంతాల్లో రిజిస్ట్రేషన్ విలువలు అక్కడి మార్కెట్ విలువ కన్నా ఎక్కువగా ఉన్నాయని అక్కడ తగ్గుతాయన్నారు.
గత ప్రభుత్వ హయాంలో అధికారులను అడ్డం పెట్టుకొని పెద్ద ఎత్తున భూ అక్రమాలకు పాల్పడ్డారని, అలాంటి వారిపై చర్యలు తీసుకుంటామన్నారు. నేరం రుజువైన అధికారులపైన కఠిన చర్యలు ఉంటాయన్నారు.
భూ వివాదాలపై సమగ్ర అధ్యయనం , 22ఏ భూములు, 596 జీవోలతో పాటు మరో నాలుగు అంశాలపై కలెక్టర్లతో కమిటీలు వేయనున్నట్లు మంత్రి తెలిపారు.
