ఏపీలో ఇతర నేరాలు తగ్గి, సైబర్ నేరాలు పెరిగాయని డీజీపీ ద్వారకా తిరుమలరావు వెల్లడించారు. సైబర్ నేరాలు అదుపు చేసేందుకు ప్రతి జిల్లాలో ఒక పోలీస్ స్టేషన్ తీసుకువస్తున్నట్లు డీజీపీ శ్రీకాకుళంలో మీడియాకు తెలిపారు. దేశ వ్యాప్తంగా సైబర్ నేరాలు పెరిగాయని వీటిని ఎలా అదుపు చేయాలనే దానిపై మదింపు జరుగుతోందన్నారు.
ఏపీలో నేరాలు తగ్గాయని డీజీపీ తెలిపారు. అయితే ఇటీవల కాలంలో డిజిటల్ అరెస్ట్ పేరుతో సైబర్ దోపిడీలు ఎక్కువయ్యాయని డీజీపీ ద్వారకా తిరుమలరావు గుర్తుచేశారు.
డిజిటల్ అరెస్ట్ అనేది అసలు లేదని, ఆన్ లైన్ మోసాలకు గురికావద్దని పిలుపునిచ్చారు. ప్రజల్లో అవగాహన పెంచేందుకు పలు కార్యక్రమాలు చేపడుతున్నట్లు డీజీపీ ప్రకటించారు.
సైబర్ నేరాలు ఆందోళనకర స్థాయిలో పెరిగిపోతున్నాయని డీజీపీ చెప్పారు. బాగా చదువుకున్న వారు కూడా సైబర్ నేరగాళ్ల ఉచ్చులో పడుతున్నారని డీజీపీ గుర్తుచేశారు. ఆన్ లైన్‌లో మోసగాళ్లకు నగదు బదిలీ చేసి మోసపోద్దని డీజీపీ పిలుపునిచ్చారు.
