అక్రమ వలసదారుల విషయంలో భారత్ సరైన నిర్ణయం తీసుకుంటుందని తాను భావిస్తున్నట్లు అమెరికా నూతన అధ్యక్షుడు డొనాల్డ్ ట్రంప్ వ్యాఖ్యానించారు. అమెరికా అధ్యక్షుడిగా రెండోసారి బాధ్యతలు చేపట్టిన తరవాత మొదటిసారి ప్రధాని మోదీతో ఫోన్‌లో సంభాషించారు. ఫిబ్రవరిలో భారత ప్రధాని అమెరికా పర్యటనకు వస్తారంటూ ట్రంప్ విలేకరుల సమావేశంలో వెల్లడించారు. భారత్, అమెరికాల మధ్య దౌత్య సంబంధాలు మరింత బలోపేతం చేసేందుకు ఇరు దేశాలు సిద్దంగా ఉన్నట్లు ట్రంప్ ప్రకటించారు.
పరస్పరం ఇరువురికి ప్రయోజనాలు కల్పించడం, దౌత్యసంబంధాలు మరింత మెరుగుపరుచుకునే విషయంలో ఇరుదేశాలు ముందడుగు వేయడానికి సిద్దంగా ఉన్నాయంటూ ప్రధాని మోదీ ఎక్స్‌లో పోస్ట్ చేశారు. ఫిబ్రవరిలో అమెరికా పర్యటన విషయాలను మోదీ వెల్లడించలేదు.
2020లో ట్రంప్ భారత్‌లో పర్యటించారు. ప్రధాన మోదీ, అమెరికా అధ్యక్షుడు ట్రంప్ ఓ భారీ ర్యాలీలో పాల్గొన్నారు. ఆ తరవాత మోదీ అమెరికా పర్యటనలోనూ ఇద్దరూ కలసి సమావేశాల్లో పాల్గొన్నారు. తాజాగా ట్రంప్ రెండోసారి అధ్యక్షుడిగా బాధ్యతలు చేపట్టిన తరవాతట్రంప్, మోదీతో మాట్లాడటం ఇదే మొదటిసారి. అమెరికాలో అక్రమంగా నివశిస్తోన్న 18వేల మంది అక్రమ వలసదారులు భారత్‌కు తిరిగి వచ్చేయాలని విదేశాంగశాఖ మంత్రి జైశంకర్ పిలుపునిచ్చిన సంగతి తెలిసిందే.
