శ్రీరామజన్మభూమి అయోధ్యలో ఐదు శతాబ్దాల పోరాటాల తర్వాత బాలరాముడి భవ్యమందిరం సాకారమవడం హిందువులందరినీ భావోద్వేగాలకు లోనుచేసింది. ఇటీవలే ఆ మందిర ప్రాణప్రతిష్ఠ మొదటి వార్షికోత్సవం కూడా వైభవంగా జరిగింది. ఆ సందర్భంలో… బాలరాముడి విగ్రహాన్ని రూపొందించడానికి కృష్ణశిలను సేకరించిన స్థలంలో అద్భుతమైన రామాలయం నిర్మించడానికి సన్నాహాలు మొదలయ్యాయి.

కర్ణాటకలోని మైసూరు ప్రాంతంలో అరోహళ్ళి అనే గ్రామంలో ఒక వ్యవసాయభూమిలో లభించిన కృష్ణశిలతో బాలరాముడి మూర్తిని తీర్చిదిద్దారు. ఆ పొలం 80 ఏళ్ళ హెచ్ రామదాస అనే వ్యక్తిది. తన పొలంలో దొరికిన రాతితో అయోధ్యరామయ్య తయారవడంతో ఆయన ఆనందానికి అవధులు లేవు. ఆ రాతిని వెలికితీసిన ప్రదేశంలో ఆయన ఒక షెడ్డు వేసి, అక్కడ రామ్‌లల్లా ఫొటో పెట్టారు. దానికి ప్రతీరోజూ పూజలు చేస్తున్నారు. ఆ ప్రదేశం స్థానికంగా భక్తులను ఆకర్షిస్తున్న తీర్థప్రదేశం అయిపోయింది.

ఇటీవల రామమందిర ప్రాణప్రతిష్ఠ మొదటి వార్షికోత్సవం సందర్భంగా ఆరోహళ్ళి గ్రామంలోని ఆ పొలంలో కూడా సుమారు 400మంది చేరి ప్రత్యేక పూజలు చేసారు. అరమణె గణేశ మందిరం పూజారి ప్రహ్లాదరావు ఆ పూజా కార్యక్రమాలు నిర్వహించారు. ఆ కార్యక్రమాలకు చాముండేశ్వరి నియోజకవర్గ ఎంఎల్ఎ జిటి దేవెగౌడ కూడా హాజరయ్యారు.  

అయోధ్య రామాలయంలో ప్రాణప్రతిష్ఠ జరిగిన గత జనవరి 22నే అరోహళ్ళిలోని పొలంలో కూడా రామమందిరం నిర్మించడానికి ఆ పొలం యజమాని రామదాస శంకుస్థాపన చేసారు. కొన్ని అనివార్య పరిస్థితుల కారణంగా ఆలయ నిర్మాణం అప్పటికి ఆగిపోయింది. ఎలాగైనా అక్కడ చిన్న గుడి కట్టాలని రామదాస మళ్ళీ ప్రయత్నాలు మొదలుపెట్టారు. రామదాస ఉత్సాహానికి స్థానిక ఎంఎల్ఎ దేవెగౌడ ఊతమిచ్చారు. అక్కడ భారీస్థాయిలో పెద్ద గుడి కట్టడానికి తనవంతు సహాయం చేస్తామని హామీ ఇచ్చారు. ఒక ట్రస్టు రిజిస్టర్ చేసి నిధులు సేకరించే ప్రయత్నం  ప్రారంభించారు.   

అయోధ్యలో బాలరాముడి మూర్తి రూపకల్పనకు తమ పొలంలోని శిల ఎంపికైందని తెలిసిన నాటినుంచీ రామదాస ఆనందానికి అవధులు లేవు. తర్వాత సీతా లక్ష్మణ భరత శత్రుఘ్నుల మూర్తులకు కూడా అక్కడినుంచే శిలను సేకరించారు. వాటికి వేటికీ ఆయన పైసా డబ్బులు తీసుకోలేదు. అంతేకాదు, ఆ రాయి సేకరించిన స్థలంలో రాముడికి గుడి కట్టాలని నిర్ణయించుకున్నారు. ఆయన నలుగురు కొడుకులు కూడా దానికి ఒప్పుకున్నారు.

అయోధ్య భవ్యమందిరంలో బాలరాముడి మూర్తికి రూపకల్పన చేసిన శిల్పి అరుణ్ యోగిరాజ్ చేతనే ఈ కొత్త ఆలయంలోనూ రాముడి మూర్తిని చెక్కించాలని రామదాస భావిస్తున్నాడు. అయోధ్య మందిరం లాంటి అద్భుతమైన మందిరమే ఆరోహళ్ళిలోనూ వెలియాలన్నది ఆయన ఆకాంక్ష.