ప్రతీ ఏడాది శుక్లపక్ష సప్తమి తిథి నాడు తిరుమలలో రథ సప్తమిని ఘనంగా నిర్వహిస్తారు. ఈ ఏడాది సూర్యజయంతిని ఫిబ్రవరి4న జరుపుతున్నట్లు టీటీడీ తెలిపింది. ఈ మేరకు జరుగుతున్న ఏర్పాట్లను టీటీడీ అధికారులు పరిశీలించి సిబ్బందికి పలు సూచనలు చేశారు.

రథసప్తమి రోజున ఉదయం నుంచి సాయంత్రం వరకు ఏడు వాహనాలపైశ్రీ మలయప్ప స్వామి వారు విహరించి భక్తులను అనుగ్రహించనున్నారు. ఉ దయం 5.30 గంటల నుంచి 8 గంటల వరకు సూర్య ప్రభ వాహనంపై విహరించనున్నారు. ఉదయం 9 గంటల నుంచి 10 గంటల వరకు చిన్న శేష వాహనంపై నుంచి అనుగ్రహిస్తారు. ఆ తర్వాత గరుడ వాహన సేవ, మధ్యాహ్నం 1 నుంచి 2 గంటల వరకు హనుమంత వాహనం సేవ జరపనున్నారు.

మధ్యాహ్నం 2 నుంచి 3 గంటల వరకు చక్రస్నానం ఘట్టం నిర్వహిస్తారు. సాయంత్రం 4 నుంచి 5 గంటల వరకు కల్పవృక్ష వాహనం, సాయంత్రం 6 నుంచి 7 గంటల వరకు సర్వభూపాల వాహనం, రాత్రి 8 నుంచి 9 గంటల వరకు చంద్రప్రభ వాహనం పై స్వామివారు భక్తులను ఆశీర్వదిస్తారు.

రథసప్తమి సందర్భంగా టీటీడీలో పలు సేవలు, ప్రివిలేజ్ దర్శనాలు రద్దు చేసినట్లు అధికారులు తెలిపారు.
అష్టదళ పాద పద్మారాధన, కళ్యాణోత్సవం, ఊంజల్ సేవ, ఆర్జిత బ్రహ్మోత్సవం, సహస్ర దీపాలంకార సేవలను టీటీడీ రద్దు చేసింది.

ఎన్.ఆర్.ఐలు, చంటి బిడ్డల తల్లిదండ్రులు, సీనియర్ సిటిజన్లు, వికలాంగుల ప్రివిలేజ్ దర్శనాలు రద్దు చేసినట్లు తెలిపింది. తిరుపతిలో ఫిబ్రవరి 3 నుంచి 5 వరకు స్లాటెడ్ సర్వదర్శనం టోకెన్లు జారీ చేయడం లేదని స్పష్టం చేసింది.

ప్రోటోకాల్ ప్రముఖులకు మినహా విఐపి బ్రేక్ దర్శనాలను రద్దు చేశారు. బ్రేక్ దర్శనాలకు సంబంధించి ఫిబ్రవరి 3న ఎలాంటి సిఫార్సు లేఖలు స్వీకరించబడవని తేల్చిచెప్పారు.