అమెరికా నూతన అధ్యక్షుడు డొనాల్డ్ ట్రంప్ ఆదేశాల మేరకు అధికారులు అక్రమ వలసదారులను అరెస్ట్ చేసే పనిని ప్రారంభించారు. దేశంలోకి అక్రమంగా చొరబడటం,దొంగతనాలు, దౌర్జన్యాలు చేయడం, మాదకద్రవ్యాలు విక్రయించడంలాంటి కార్యక్రమాలకు పాల్పడే 500 మందిని గుర్తించి అరెస్ట్ చేసినట్లు
వైట్ హౌస్ మీడియా ప్రతినిధి కరోలిన్ లివిట్ వెల్లడించారు. గడచిన మూడు రోజుల్లోనే వేలాది అక్రమ వలసదారులను సైనిక విమానాల్లో తరలించినట్లు కరోలిన్ స్పష్టం చేశారు.
అమెరికాలో అక్రమ వలసదారులను గుర్తించేందుకు పోలీసులు జల్లెడపడుతున్నారు. సరైన పత్రాలు లేకుండా అక్రమంగా అమెరికాలో చొరబడి దొంగతనాలకు పాల్పడుతున్న వందలాది మందిని కూడా అరెస్ట్ చేశారు. అరెస్టైన వారిలో స్మగ్లర్లు, లైంగిక వేధింపుల కేసులు ఎదుర్కొంటున్న వారు కూడా ఉన్నారని కరోలిన్ వెల్లడించారు. అమెరికా నూతన అధ్యక్షుడిగా బాధ్యతలు చేపట్టగానే ట్రంప్ సంతకాలు చేసిన ఆర్డర్లు అమల్లోకి వచ్చాయని కరోలిన్ తెలిపారు.
అమెరికాలో అక్రమంగా ఉంటోన్న భారతీయులు తిరిగి స్వదేశానికి రావాలని విదేశాంగ మంత్రి జైశంకర్ పిలుపునిచ్చారు. అమెరికాలో పలు దేశాల నుంచి 60 లక్షల మంది అక్రమ వలసదారులు ప్రవేశించినట్లు గణాంకాల ద్వారా తెలుస్తోంది. ఇప్పటికే మెక్సికో నుంచి అమెరికాలో చొరబడిన వారిని సరిహద్దులు దాటిస్తున్నారు. వారి కోసం మెక్సికో అమెరికా సరిహద్దు వెంట పెద్ద ఎత్తున శిబిరాలు ఏర్పాటు చేస్తోంది.
