శబరిమలలో మండలపూజ, మకర విళక్కు వార్షిక పూజలు ముగిశాయి. ఆలయాన్ని మూసివేసినట్లు తిరువాంకూర్ (ట్రావెన్‌కోర్ దేవస్థానం) బోర్డు అధికారులు తెలిపారు. పందలం రాజకుటుంబ ప్రతినిధి త్రికేత్తనాల్ రాజరాజ వర్మ, స్వామిని దర్శనం చేసుకున్న తర్వాత ఆలయాన్ని మూసివేశారు.
సోమవారం ఉదయం 5 గంటలకు ఆలయాన్ని తెరిచారు. అనంతరం తూర్పు మండపంలో గణపతి హోమం నిర్వహించగా, మేల్శాంతి అరుణ్ కుమార్ నంబూద్రి అయ్యప్ప విగ్రహానికి విభూతాభిషేకం చేసి రుద్రాక్షలతో అలంకరించారు. ‘హరివరాసనం’ పారాయణం తర్వాత మేల్శాంతి ఆలయ దీపాలను ఆర్పి గర్భగుడిని అధికారికంగా మూసివేశారు. ఆలయ తాళాలను రాజకుటుంబ సభ్యుడికి అప్పగించారు.
ఈ సీజన్‌లో 53 లక్షల మందికిపైగా భక్తులు అయ్యప్ప స్వామివారిని దర్శించుకున్నట్లు దేవస్థానం బోర్డు ప్రకటనలో తెలిపింది.
రెండు నెలల పాటు జరిగే మండల-మకర విళక్కు వార్షిక పూజల కోసం నవంబర్‌ 15న అయ్యప్ప స్వామి ఆలయాన్ని తెరిచారు. మండల పూజ అనంతరం డిసెంబర్‌ 26న గుడిని మూసివేశారు. నాలుగు రోజుల విరామం తర్వాత డిసెంబర్‌ 30న మళ్లీ ఆలయాన్ని తెరిచారు.
