దిల్లీ అసెంబ్లీ ఎన్నికలకు బీజేపీ ‘ సంకల్ప పత్రాన్ని’ విడుదల చేసింది. మహిళా సాధికారిత, పేదరికాన్ని రూపుమాపడమే లక్ష్యంగా పలు వాగ్దానాలు చేసింది. తమకు దిల్లీ అసెంబ్లీలో అధికారం అప్పగిస్తే గర్భిణీలకు రూ.21,000, మహిళలకు నెలకు రూ.2,500, గ్యాస్‌ సిలిండర్‌పై రూ.500 రాయితీ ఇస్తామని హామీ ఇచ్చింది.

ఎన్నికల హామీలకు సంబంధించిన ‘సంకల్ప్ పత్రాన్ని’ బీజేపీ జాతీయ అధ్యక్షుడు, కేంద్రమంత్రి జేపీ నడ్డా శుక్రవారం విడుదల చేశారు. మహిళా సమృద్ధి యోజన కింద దిల్లీలోని ప్రతి మహిళకు నెలకు రూ.2,500 అందిస్తామని ఆయన తెలిపారు. తొలి కేబినెట్ సమావేశంలోనే ఈ పథకాన్ని ఆమోదించి అమలు చేస్తామని చెప్పారు.

ఎల్పీజీ వాడుతున్న కుటుంబాలకు సిలిండర్‌పై రూ.500 రాయితీ ఇవ్వడంతో పాటు హోలీ, దీపావళి సందర్భంగా ఒక్కో గ్యాస్ సిలిండర్‌ ఉచితంగా అందుకుంటారని చెప్పారు.
కేంద్రం ప్రతిష్టాత్మకంగా చేపట్టిన ఆయుష్మాన్ భారత్ ఆరోగ్య పథకాన్ని దిల్లీలో అమలు చేస్తామన్నారు. రూ.5 లక్షల ఆరోగ్య బీమాకు అదనంగా మరో రూ.5 లక్షల ఆరోగ్య రక్షణను ప్రతికుటుంబానికి కల్పిస్తామన్నారు.
అటల్ క్యాంటీన్ల ద్వారా మురికివాడల్లో రూ.5కే పౌష్టికార భోజనం అందిస్తామని బీజేపీ ఇప్పటికే హామీ ఇచ్చింది. ఉచిత విద్యుత్‌, మహిళలకు ఉచిత బస్సు ప్రయాణం వంటి అమలులో ఉన్న పథకాలను కూడా కొనసాగిస్తామని స్పష్టం చేసింది.