గిరి శిఖర గ్రామాల్లో అడవి బిడ్డలకు అరోగ్య అత్యవసర పరిస్థితులు ఎదురైతే డోలీల్లో మోసుకొని కిలోమీటర్ల కొద్దీ నడుచుకొంటూ వెళ్ళే కష్టాలు ఇకపై తీరనున్నాయి. పార్వతీపురం మన్యం జిల్లా పరిధిలోని గిరిజన గ్రామాల్లో రోడ్ల పండుగ మొదలయ్యింది. ఎన్నికల ముందు ఇచ్చిన హామీ నెరవేరుస్తూ గిరిజన గ్రామాల డోలీ కష్టాలు తీర్చేందుకు ఉపముఖ్యమంత్రి పవన్ కళ్యాణ్ శ్రీకారం చుట్టారు.

పార్వతీపురం మన్యం జిల్లా పరిధిలోని గిరిజన గ్రామాల్లో బీటీ రోడ్ల నిర్మాణానికి గిరిజన, మహిళా శిశు సంక్షేమ శాఖ మంత్రి గుమ్మిడి సంధ్యారాణితో కలసి పవన్ కళ్యాణ్ శంకుస్థాపన చేశారు. సాలూరు నియోజకవర్గం మక్కువ మండలం పనసభద్ర గ్రామ పంచాయతీ పరిధిలోని బాగుజోల – సిరివర మధ్య రూ. 9.50 కోట్ల అంచనా వ్యయంతో నిర్మించే బీటీ రోడ్డు పనులను బాగుజోల వద్ద ప్రారంభించారు. ఆ రహదారి నిర్మాణంతో సిరివర, చిన్న మండంగి, చిలక మండంగి, మరికొన్ని గిరిశిఖర గ్రామాల వాసులకు డోలీ కష్టాలు తీరనున్నాయి. పార్వతీపురం మన్యం జిల్లా పరిధిలోని మరో 19 గిరిజన గ్రామాల్లో 16 బీటీ రోడ్ల నిర్మాణ పనులను కూడా పవన్ కళ్యాణ్ ప్రారంభించారు. ఉపాధి హామీ పథకం కింద రూ.20.11 కోట్ల అంచనా వ్యయంతో వాటిని నిర్మిస్తారు.

వీటితో పాటు మొత్తం రూ.36.71 కోట్ల అంచనా వ్యయంతో 39.32 కిలోమీటర్ల మేర 19 కొత్త రహదారులు నిర్మిస్తారు. ఈ రోడ్ల నిర్మాణంతో 55 గిరిజన గ్రామాల్లో నివశిస్తున్న సుమారు 3,782 మంది గిరిజనులు డోలీ మోత కష్టాల నుంచి విమక్తి పొందనున్నారు.

అంతకు ముందు బాగుజోల వద్ద గిరిజన గ్రామాల్లో స్థితిగతులు, వారి అభివృద్ధికి ఐటీడీఏ కార్యక్రమాలు, రహదారుల నిర్మాణం వంటి అంశాలపై ఏర్పాటు చేసిన ఫోటో ఎగ్జిబిషన్‌ను పవన్‌కళ్యాణ్ చూసారు.

ఈ కార్యక్రమంలో శాసన సభ్యులు నిమ్మక జయకృష్ణ, శ్రీమతి జగదీశ్వరి, శ్రీమతి లోకం మాధవి, పంచాయతీరాజ్ గ్రామీణాభివృద్ధి శాఖ కమిషనర్ కృష్ణతేజ, పార్వతీపురం మన్యం జిల్లా కలెక్టర్ ఎ శ్యాంప్రసాద్, ఎస్పీ మాధవరెడ్డి, వివిధ శాఖల ఉన్నతాధికారులు పాల్గొన్నారు.