ప్రపంచంలోనే టాప్- 10 విశ్వవిద్యాలయాలు, టాప్- 10 ఆస్పత్రులు ఏపీ రాజధాని అమరావతికి వస్తాయని సీఎం చంద్రబాబు అన్నారు. కలెక్టర్ల సదస్సు లో భాగంగా రెండో రోజు సమావేశంలో పలుశాఖలపై సీఎం సమీక్షించారు. ప్రజారాజధాని అమరావతి, యువతకు ఉపాధి కల్పించే ప్రాంతంగా మారుతుందన్నారు.
విశాఖ, తిరుపతి, అమరావతి నగరాలపై దృష్టి సారించి వచ్చే ఐదేళ్లలో 20 లక్షల ఉద్యోగాలను కల్పించే లక్ష్యంతో పనిచేయాలని సూచించారు. ఒక కుటుంబం ఒక ఎంట్రప్రెన్యూర్ అనేది అమలు కావాలన్నారు.
సీఆర్డీఏ కమిషనర్ కె. భాస్కర్, అమరావతి రాజధాని పనులు పై ప్రజంటేషన్ ఇచ్చారు. రాజధాని పనుల పున:ప్రారంభానికి గాను రూ. 20,500 కోట్ల కు సీఆర్డీఏ అథారిటీ ద్వారా పరిపాలనా ఆమోదం తీసుకోవడం జరిగిందన్నారు. ఇప్పటి వరకు అమరావతి రాజధాని నిర్మాణ పనులకు సంబంధించి రూ. 31వేల కోట్ల టైఅఫ్ చేశామని తెలిపారు.
ఆసియా అభివృద్ధి బ్యాంకు అమరావతి రాజధానికి రూ. 15000 కోట్ల రుణం మంజూరుకు ఆమోదం తెలిపిందని గుర్తు చేశారు. అమరావతి రాజధాని పరిధిలోని ఆర్-5 జోన్లో గత ప్రభుత్వం 50,793 మంది లబ్ధిదారులకు ఇళ్ళ స్థలాలు ఇచ్చేందుకు చర్యలు చేపట్టగా వారికి సంబంధిత జిల్లాల్లోనే ఇళ్ళు ఇచ్చేందుకు వీలుగా అనువైన స్థలాలను గుర్తించాలని కలెక్టర్లను కోరారు.
గత ఐదేళ్లలో పనులను పట్టించుకోకపోవడంతో రాజధాని నిర్మాణంలో సమస్యలు ఏర్పడ్డాయని తెలిపారు. ప్రస్తుతం ఏపీ సీఆర్డీఏ పరిధిని యధాతద స్థితికి తీసుకురావడం జరిగిందన్నారు.
