రాయచోటిలో దారుణం చోటు చేసుకుంది. విద్యార్ధుల మధ్య గొడవను రాజీ చేసే ప్రయత్నంలో ఉపాధ్యాయుడు ప్రాణాలు కోల్పోయాడు. పోలీసులు తెలిపిన వివరాల ప్రకారం.
రాయచోటిలోని ఉర్దూ పాఠశాలలో ఏజాష్ అహ్మద్ సైన్స్ ఉపాధ్యాయుడుగా చేస్తున్నారు. పదో తరగతి విద్యార్థులకు క్లాసు చెబుతుండగా తొమ్మిదో తరగతి గదిలో విద్యార్ధులు కొట్టుకోవడం ప్రారంభించారు. ఇది గమనించిన ఉపాధ్యాయుడు వారికి సర్దిచెప్పే ప్రయత్నం చేశాడు. అందులో భాగంగా ఓ విద్యార్ధిని గట్టిగా మందలించినట్లు తెలుస్తోంది. అది మనసులో పెట్టుకుని ముగ్గురు విద్యార్థులతో కలసి ఉపాధ్యాయుడి గుండెపై బలంగా కొట్టినట్లు తెలుస్తోంది.
ఆ వెంటనే పాఠశాలలోని ఇతర ఉపాధ్యాయులు కూడా అక్కడకు వచ్చి అహ్మద్‌ను ప్రధానోపాధ్యాయుడి గదికి తీసుకెళ్లారు. అలసటగా ఉందని, ఊపిరి తీసుకోవడం కష్టంగా ఉందని చెప్పడంతో రాయచోటిలోని ప్రభుత్వ ఆసుపత్రికి తరలించారు. అప్పటికే అహ్మద్ చనిపోయినట్లు డాక్టర్లు నిర్థారించారు.గుండెపోటుతో మరణించినట్లు డాక్టర్లు చెబుతున్నారు.
ఉపాధ్యాయుడు అహ్మద్ మృతిపై ఆయన భార్య రెహమూన్ పోలీసులకు ఫిర్యాదు చేశారు. ఛాతిపై బలంగా కొట్టడంతోనే చనిపోయారని ఆమె ఫిర్యాదులో పేర్కొన్నారు. అహ్మద్ మృతదేహాన్ని పోస్టుమార్టంకు అప్పగించారు. నివేదిక వచ్చిన తరవాత అహ్మద్ మృతికి కారణాలు తెలిసే అవకాశముంది. పోలీసులు కేసు నమోదు చేసి దర్యాప్తు చేస్తున్నారు.
