ఎన్నికల ముందు కూటమి ఇచ్చిన హామీ మేరకు కర్నూలులో హైకోర్టు బెంచ్ ఏర్పాటు చేయబోతున్నామని ముఖ్యమంత్రి నారా చంద్రబాబు నాయుడు వెల్లడించారు. ఆ అంశాన్ని ముందు రాష్ట్ర మంత్రివర్గం ఆమోదించిందని చెప్పారు. శాసనసభలో చేసిన తీర్మానాన్ని హైకోర్టుకు, కేంద్ర ప్రభుత్వానికి పంపుతామన్నారు. హైకోర్ట్ బెంచ్‌ను కర్నూలులో ఏర్పాటు చేయడంపై అసెంబ్లీలో తీర్మానం చేసాక చంద్రబాబు మాట్లాడారు.
‘‘లోకాయుక్త, రాష్ట్ర మానవ హక్కుల కార్యాలయాల తరలింపు ఉండదు. అవి కర్నూలులోనే ఉంటాయి. రాష్ట్ర సమగ్రాభివృద్ధికి కట్టుబడి ఉన్నాం. ఉత్తరాంధ్రలో విశాఖ, సీమలో కర్నూలు, తిరుపతి పట్టణాలను మరింత అభివృద్ధి చేస్తాం. మూడు రాజధానుల పేరుతో గత ప్రభుత్వం మూడు ముక్కలాటలాడి ఏ ప్రాంతం అభివృద్ధి కాకుండా చేసారు. రాష్ట్ర సమగ్ర అభివృద్ధి టీడీపీతోనే సాధ్యం.
ఎడారిగా మారుతున్న రాయలసీమకు కృష్ణా జలాలను తరలించాలని ఆలోచించింది ఎన్టీఆర్. ఆయనే తెలుగుగంగ, హంద్రీనీవా, నగరి గాలేరు ప్రాజెక్టులు ప్రారంభించారు. వాటిని పూర్తి చేసేది ఎన్డీయే ప్రభుత్వమే. నదులు అనుసంధానం చేసి, పోలవరం పూర్తి చేసి గోదావరి నీళ్ళను బసకచర్ల తీసుకెళ్తే రాష్ట్ర పరిస్థితి మారిపోతుంది. కియా పరిశ్రమను తెచ్చేందుకు యేడాదిలోనే గొల్లపల్లి రిజర్వాయర్ పూర్తి చేశాం. కియా రాకతో అనంతపురం జిల్లా ముఖచిత్రమే మారిపోయింది. అక్కడ హార్టికల్చర్ అభివృద్ధి చేస్తే మహర్దశ వస్తుంది. అనంతపురానికి బెంగళూరు, కర్నూలుకు హైదరాబాద్, చిత్తూరుకు చెన్నై విమానాశ్రయాలు దగ్గర. ఆ అవకాశాలను అభివృద్ధికి వాడుకోవచ్చు. సీమలో మంచి రోడ్లు టీడీపీ హయాంలోనే వచ్చాయి. ఓర్వకల్లులో ఎయిర్‌పోర్టు పెట్టాం. తిరుపతి విమానాశ్రయాన్ని విస్తరించి సర్వీసులు పెంచాం. కడప ఎయిర్ పోర్టులో రాత్రి సమయంలోనూ విమానాలు దిగే అవకాశం కల్పించాం. నాలుగు ఉమ్మడి జిల్లాల్లో నాలుగు ఎయిర్ పోర్టులు ఉన్నాయి.
రాయలసీమలో విద్యకు అధిక ప్రాధాన్యం ఇచ్చాం. తిరుపతిని ఎడ్యుకేషన్ హబ్ గా మారుస్తున్నాం. తిరుపతిలో ఐఐటీ, ఐజర్, కర్నూలులో ట్రిపుల్ ఐటీ, ఉర్దూ యూనివర్సిటీ, అనంతపురంలో సెంట్రల్ వర్సిటీ పెట్టాం. మిషన్ రాయలసీమ హామీలను నెరవేరుస్తాం. సీమను హార్టికల్చర్ హబ్ గా మార్చేందుకు 90 శాతం రాయితీతో డ్రిప్ సబ్సిడీ ఇచ్చాం. గత ప్రభుత్వం దాన్నీ రద్దు చేసింది. మళ్ళీ రాయితీతో రైతులకు డ్రిప్ ఇస్తాం. గత ప్రభుత్వం రాయలసీమకు చీమంత మేలు కూడా చేయలేదు. తిరుపతి హార్డ్‌వేర్ హబ్‌గా మారింది టీడీపీ హయాంలోనే. కేంద్రం ఇచ్చిన రెండు ఇండస్ట్రియల్ పార్కులను కర్నూలు జిల్లా ఓర్వకల్లు, కడప జిల్లా కొప్పర్తిలో ఏర్పాటు చేశాం. వాటి అభివృద్ధికి రూ.5వేల కోట్లు మంజూరయ్యాయి. ఓర్వకల్లులో 300 ఎకరాల్లో డ్రోన్‌హబ్ ఏర్పాటు చేస్తున్నాం.’’
