ప్రధానమంత్రి నరేంద్ర మోదీ నిర్వహిస్తున్న ‘మన్‌కీ బాత్’ కార్యక్రమం ఎంతో ప్రాచుర్యం పొందింది. ప్రభుత్వ కార్యక్రమాలు, సామాజిక సమస్యలు, విశిష్ట వ్యక్తులు, సందర్భాలపై ప్రధాని మోదీ, తన అభిప్రాయాలను దేశప్రజలతో పంచుకుంటున్నారు. పీఎం ‘మన్‌కీ బాత్’ తరహాలోనే ఏపీ సీఎం చంద్రబాబునాయుడు కూడా ప్రత్యేక కార్యక్రమం ద్వారా నేరుగా ఏపీ ప్రజలతో మాట్లాడాలనుకుంటన్నారు. ఆడియో, వీడియో రూపంలో ఈ కార్యక్రమాన్ని నిర్వహించే అవకాశం ఉందని అధికారిక వర్గాల ద్వారా తెలుస్తోంది. ప్రస్తుతానికి ఈ ప్రతిపాదన ఇంకా చర్చల దశలోనే జరుగుతుంది.
అసెంబ్లీ సమావేశాల్లో సీఎం చంద్రబాబు ఈ విషయాన్ని వెల్లడించారు. త్వరలోనే ప్రజలతో మమేకం అవుతామని తెలిపారు. అందుకు అవసరమైన ఏర్పాట్లు జరుగుతున్నాయని వెల్లడించారు. సంక్రాంతి నుంచి ఈ కార్యక్రమం ప్రారంభమయ్యే అవకాశం ఉన్నట్లు తెలుస్తోంది.
చంద్రబాబు 1995-2004 మధ్య ముఖ్యమంత్రిగా పనిచేసిన సమయంలో ‘డయల్‌ యువర్‌ సీఎం’ ప్రత్యేక కార్యక్రమాన్ని నిర్వహించారు. ఆ కార్యక్రమం, మన్ కీ బాత్ కలయికలో ఒక కొత్త కార్యక్రమం ద్వారా ప్రజలతో నేరుగా మాట్లాడాలని చంద్రబాబు భావిస్తున్నారు.
