ముఖ్యమంత్రి చంద్రబాబు నాయుడు సోదరుడు, చంద్రగిరి మాజీ ఎమ్మెల్యే నారా రామ్మూర్తి నాయుడి అంత్యక్రియలు ముగిసాయి. స్వగ్రామమైన నారావారిపల్లెలో ఆదివారం ప్రభుత్వ లాంఛనాల నడుమ అంత్యక్రియలు పూర్తయ్యాయి.
కొంతకాలంగా అనారోగ్యంతో బాధపడుతున్న రామ్మూర్తినాయుడు హైదరాబాద్ లోని ఏఐజీ ఆసుపత్రిలో చికిత్స పొందుతూ శనివారం ఉదయం తుదిశ్వాస విడిచారు. ఆయన మృతదేహాన్ని ఈ ఉదయం 7 గంటలకు ప్రత్యేక విమానంలో హైదరాబాద్ నుండి రేణిగుంటకు తీసుకొచ్చి, అక్కడి నుండి రోడ్డు మార్గంలో నారావారిపల్లెకు తరలించారు.
రామ్మూర్తి నాయుడి భౌతిక కాయాన్ని అభిమానులు, ఆప్తులు, బంధుమిత్రులు, నేతలు, ప్రజల సందర్శనార్ధం సీఎం చంద్రబాబు నివాసంలో ఉంచారు. మహారాష్ట్ర గవర్నర్ సీపీ రాధాకృష్ణన్, తెలుగు రాష్ట్రాలకు చెందిన పలువురు రాజకీయ నేతలు, సినీ ప్రముఖులు రామ్మూర్తి నాయుడుకి నివాళులర్పించారు. చంద్రబాబు, లోకేష్, రామ్మూర్తి కుటుంబ సభ్యులు ఇందిర, రోహిత్, గిరీష్‌లను పరామర్శించారు.
మధ్యాహ్నం 2.30 గంటలకు రామ్మూర్తి నాయుడి అంతిమయాత్ర కొనసాగింది. రామ్మూర్తి నాయుడుని చివరి చూపు చూసేందుకు జనం పెద్ద ఎత్తున తరలివచ్చారు. ఇతర కుటుంబసభ్యులతో పాటు చంద్రబాబు, లోకేష్ కూడా పాడె మోసారు. తల్లిదండ్రులు అమ్మణ్ణమ్మ, ఖర్జూరనాయడు అంత్యక్రియలు జరిగిన ప్రాంతంలోనే ప్రభుత్వ లాంఛనాలతో రామ్మూర్తి నాయుడి దహన సంస్కారాలు జరిగాయి.
