ఆంధ్రప్రదేశ్ ముఖ్యమంత్రి చంద్రబాబు నాయుడు తమ్ముడు నారా రామ్మూర్తినాయుడు తుదిశ్వాస విడిచారు. హైదరాబాద్ గచ్చిబౌలిలోని ఏఐజీ ఆసుపత్రిలో చికిత్స పొందుతూ ఆయన తుదిశ్వాస విడిచారు. నేటి మధ్యాహ్నం 12.45 గంటలకు గుండెపోటుతో కన్నుమూశారని ఆసుపత్రి వైద్యులు ప్రకటించారు.
రామ్మూర్తి నాయుడు, ఈ నెల 14న గుండె సంబంధిత సమస్యలతో ఆసుపత్రిలో చేరినట్లు ఆస్పత్రి వర్గాలు పేర్కొన్నాయి. రామ్మూర్తినాయుడు వయసు 72 ఏళ్ళు.
చినాన్న రామ్మూర్తి నాయుడు ఆరోగ్యం విషమించిందనే వార్త తెలిసిన వెంటనే మంత్రి నారా లోకేశ్ విజయవాడ నుంచి హైదరాబాద్ బయలుదేరారు. దగ్గుబాటి పురందేశ్వరితో పాటు నారా, నందమూరి కుటుంబసభ్యులు ఆసుపత్రికి చేరుకుని రామ్మూర్తి నాయుడు కుటుంబ సభ్యులను పరామర్శించారు. దిల్లీ పర్యటనలో ఉన్న చంద్రబాబు కాసేపట్లో హైదరాబాద్ కు చేరుకోనున్నారు.
రామ్మూర్తినాయుడు అంత్యక్రియలు రేపు ఆయన స్వగ్రామమైన నారావారిపల్లెలో నిర్వహించనున్నట్టు కుటుంబసభ్యులు జారీ చేశారు.
1994లో టీడీపీ తరపున చంద్రగిరి ఎమ్మెల్యేగా రామ్మూర్తినాయుడు విజయం సాధించారు. రామ్మూర్తి నాయుడుకి భార్య ఇందిర, కుమారులు నారా రోహిత్, గిరీశ్ ఉన్నారు.
