ఉత్తరాఖండ్‌లోని అల్మోరా జిల్లాలో ఈ ఉదయం ఒక బస్సు లోయలో పడిపోయింది. ఆ ప్రమాదంలో ఏడుగురు చనిపోయారు, పలువురు గాయపడ్డారు.
బస్సు గఢ్వాల్ నుంచి కుమావొన్ వెడుతుండగా అల్మోరా జిల్లాలోని మార్చులా అనే ప్రదేశం దగ్గర ప్రమాదం జరిగిందని జిల్లా కలెక్టర్ అలోక్ కుమార్ పాండే చెప్పారు. సుమారు 200మీటర్ల లోతైన లోయలో బస్సు పడిపోయింది, ఆ ప్రమాద సమయంలో బస్సులో సుమారు 40 మంది ప్రయాణికులు ఉన్నారని వివరించారు.
రాష్ట్ర పోలీసులు, ఎస్‌డిఆర్ఎఫ్ సిబ్బంది ఘటనా స్థలానికి చేరుకున్నారు. బాధితుల గాలింపు చర్యలు ప్రారంభించారు.
గాయపడిన వారిని లోయలోనుంచి వెలికితీసి దగ్గరలో ఉన్న ఆరోగ్య కేంద్రాలకు చికిత్స కోసం తరలిస్తున్నారు. తీవ్రంగా గాయపడిన వారు ఎవరైనా ఉంటే, వారికి చికిత్స అత్యవసరమైతే, వారిని విమానమార్గంలో తరలించడానికి కూడా ఏర్పాట్లు చేసామని కలెక్టర్ అలోక్ కుమార్ వెల్లడించారు.
ప్రమాదానికి కారణాలు ఇంకా తెలియరాలేదు. సంఘటనపై విచారణకు ఆదేశిస్తామని జిల్లా కలెక్టర్ చెప్పారు.
