అగ్రరాజ్యం అమెరికాలో దీపావళి వేడుకలు ఘనంగా జరిగాయి. అధ్యక్ష భవనం వైట్‌హౌస్‌లో మిలటరీ బ్యాండ్ మీద ‘ఓం జై జగదీశ హరే’ ప్రార్థనాగీతాన్ని వాయించడం విశేషం.
అంతర్జాతీయ ద్రవ్యనిధి సంస్థ ఐఎంఎఫ్‌ డిప్యూటీ మేనేజింగ్ డైరెక్టర్ అయిన గీతా గోపీనాథ్, వైట్‌హౌస్‌లో దీపావళి వేడుకలకు హాజరయ్యారు. దీపావళి పండుగ సందర్భంగా వైట్‌హౌస్‌ను పూలతో అలంకరించారు. చాలామంది అతిథులు సంప్రదాయ భారతీయ వస్త్రధారణతో హాజరయ్యారు. అక్కడ ‘ఓం జై జగదీశ హరే’ ప్రార్థనాగీతాన్ని అమెరికన్ మిలటరీ బ్యాండ్ మీద వాయించిన వీడియోను గీతా గోపీనాథ్ తన ఎక్స్ ఖాతాలో ట్వీట్ చేసారు.
అమెరికా-భారత్ బంధాన్ని నిర్మించడంలో భారతీయ అమెరికన్ల సేవలను గౌరవిస్తూ వైట్‌హౌస్‌లో దీపావళి వేడుకలు నిర్వహించారు. భారత్‌లో అమెరికా రాయబారి ఎరిక్ గార్సెట్టి దీపావళి ప్రాముఖ్యాన్ని, అమెరికాలో భారతీయుల సేవలనూ ప్రశంసించారు.
అమెరికా ప్రథమమహిళ జిల్ బైడెన్, అధ్యక్షుడు జో బైడెన్ దంపతులు అక్టోబర్ 28న వైట్‌హౌస్‌లో దీపావళి వేడుకలు నిర్వహించారు. ఆ కార్యక్రమానికి అమెరికాలోని అన్ని రాష్ట్రాల్లోని ప్రముఖ భారతీయ అమెరికన్లను ఆహ్వానించారు.
