ప్రపంచ ప్రఖ్యాత వైద్య శాస్త్రవేత్త దివంగత డా.యల్లాప్రగడ సుబ్బారావు పేరును ఏదైనా ప్రభుత్వ వైద్య కళాశాలకు పెట్టాలని రాష్ట్ర ఉపముఖ్యమంత్రి పవన్‌కళ్యాణ్ ప్రతిపాదించారు. ఆ మేరకు ముఖ్యమంత్రి చంద్రబాబునాయుడుకు వివరాలు అందించారు.
ప్రపంచానికి పలు ఔషధాలు అందించిన శాస్త్రవేత్త డా.యల్లాప్రగడ సబ్బారావు స్వస్థలం భీమవరం, ఆయన చదువుకున్నది రాజమహేంద్రవరం. కాబట్టి, కొత్తగా ఏర్పడిన ఏలూరు, రాజమహేంద్రవరం ప్రభుత్వ వైద్య కళాశాలల్లో ఏదైనా ఒకదానికి ఆయన పేరుపెడితే సముచితంగా ఉంటుందని పవన్‌కళ్యాణ్ కోరారు. ఆ ప్రతిపాదనను పరిశీలించాలని ముఖ్యమంత్రి వైద్య ఆరోగ్య శాఖకు సూచించారు. తన ప్రతిపాదనపై సానుకూలంగా స్పందించినందుకు ముఖ్యమంత్రికి పవన్‌కళ్యాణ్ కృతజ్ఞతలు తెలిపారు.
‘తొలి టెట్రాసైక్లిన్ యాంటీ బయాటిక్ ‘అరియోమైసిన్’ కనుగొన్నది డా. యల్లాప్రగడ సుబ్బారావు గారు. బోద వ్యాధి (ఫైలేరియా)కి సంబంధించి హెట్రజాన్, క్షయ వ్యాధి కట్టడికి ‘ఐసోనికోటినిక్ ఆసిడ్ హైడ్రాజైడ్’ రూపొందించారు. క్యాన్సర్‌కి వాడే కిమోథెరపీ ఔషధాల్లో తొలి తరం డ్రగ్ ‘మెథోట్రెస్సెట్’ను మరో శాస్త్రవేత్తతో కలసి అభివృద్ధి చేశారు. భారతీయులందరికీ గర్వ కారణమైన శాస్త్రవేత్త డా.యల్లాప్రగడ సుబ్బారావు గారు’ అని పవన్‌కళ్యాణ్ చెప్పారు.
