ఎన్నికల సమయంలో ‘సూపర్ సిక్స్’ పేరిట ఇచ్చిన హామీల్లో ఒకటైన ఉచిత గ్యాస్ సిలెండర్ల పథకాన్ని కూటమి ప్రభుత్వం అమల్లోకి తెచ్చింది. దీపం-2 పథకానికి రాష్ట్రప్రభుత్వం నిధులు విడుదల చేసింది. ఎన్నికల ముందు ప్రకటించిన సూపర్-6 హామీల్లో ఒకటైన యేడాదికి 3 ఉచిత గ్యాస్ సిలెండర్ల పథకానికి ఖర్చయ్యే నిధులను సీఎం చంద్రబాబునాయుడు ఇవాళ పెట్రోలియం సంస్థలకు అందజేశారు.
హిందుస్తాన్ పెట్రోలియం, భారత్ పెట్రోలియం, ఇండియన్ ఆయిల్ కార్పొరేషన్ సంస్థల ప్రతినిధులకు ముఖ్యమంత్రి ఈ సబ్సిడీ మొత్తాన్ని ఇవాళ సచివాలయంలో అందించారు. ఏడాదికి మూడు సిలెండర్లు ఇచ్చేందుకు రాష్ట్ర ప్రభుత్వం నిర్ణయించింది. దానికయ్యే రూ.2,684 కోట్ల ఖర్చుకు క్యాబినెట్ ఆమోదం తెలిపింది. అందులో భాగంగా ప్రభుత్వం పెట్రోలియం సంస్థలకు చెక్కు అందజేసింది. రూ.2,684 కోట్ల మంజూరుకు అంగీకారం తెలుపుతూ మొదటి సిలెండర్ కు ఖర్చు అయ్యే రూ.894 కోట్లు పెట్రోలియం సంస్థలకు అందించింది. దీపం-2 పథకంలో భాగంగా ప్రతి నాలుగు నెలలకు ఒక సిలెండర్ చొప్పున ప్రభుత్వం పేద ప్రజలకు అందించనుంది. యేడాదికి మూడు విడతల్లో ప్రభుత్వం మూడు గ్యాస్ సిలెండర్లకు అయ్యే ఖర్చు సొమ్మును విడుదల చేయనుంది.
ఈ పథకం కింద గ్యాస్ బుక్ చేసుకునే అవకాశాన్ని రాష్ట్రప్రభుత్వం లబ్ధిదారులకు అక్టోబర్ 29 నుంచీ కల్పించింది. సిలెండర్ అందిన 48 గంటల్లో లబ్ధిదారులు దానికి వెచ్చించిన సొమ్ము వారి ఖాతాలో జమ అవుతుంది. కేంద్రం ఇచ్చే రూ.25 రాయితీ పోను మిగిలిన రూ.876 రాష్ట్ర ప్రభుత్వం అందిస్తుంది. ఈ పథకం అమలుకు ప్రతీ యేటా రూ.2,684 కోట్లు ప్రభుత్వంపై ఆర్థిక భారం పడనుంది.
ఈ కార్యక్రమంలో పౌరసరఫరాల శాఖా మంత్రి నాదెండ్ల మనోహర్, దీపం పథకం లబ్ధిదారులు, పెట్రోలియం సంస్థల ప్రతినిధులు పాల్గొన్నారు.
