మహారాష్ట్ర  శాసనసభకు త్వరలో జరగనున్న ఎన్నికల్లో  288 స్థానాలకు గాను దాదాపు 8 వేల మంది అభ్యర్థులు నామినేషన్లు వేశారు.  వచ్చే నెల 20న పోలింగ్ జరగనుండగా మొత్తం 7,995 మంది అభ్యర్థులు 10,905 నామినేషన్లు దాఖలు చేసినట్టు ఎన్నికల సంఘం తెలిపింది.

ఈ నెల 22న నామినేషన్ల స్వీకరణ ప్రారంభం కాగా 29న ముగిసింది. నవంబర్ 4న మధ్యాహ్నం మూడు గంటల వరకు నామినేషన్లను ఉపసంహరించుకునే అవకాశం ఉంది. గత ఎన్నికల్లో 5,543 నామినేషన్లు దాఖలు అయ్యాయి.

తాజా, ఎన్నికల విషయానికి వస్తే నాసిక్ జిల్లాలో అత్యధికంగా 361 మంది అభ్యర్థులు 506 నామినేషన్ల సెట్లు దాఖలు చేశారు. మంత్రులు దాదా భూసే (శివసేన) మాలేగావ్ అవుట్ నుంచి పోటీకి దిగగా,  చగన్ భుజ్‌బల్ (ఎన్సీపీ) యేవల్ నుంచి అదృష్టాన్ని పరీక్షించుకుంటున్నారు.  సుహాస్ కండే (శివసేన) నందగావ్ నుంచి, రాహుల్ ధిక్లే (బీజేపీ) నాసిక్ ఈస్ట్ నుంచి నామినేషన్ వేశారు.