ఏపీలో నిర్వహించే టెట్ -2024 పరీక్షలకు అన్ని ఏర్పాట్లు చేసినట్లు పాఠశాల విద్య డైరెక్టర్ విజయరామరాజు తెలిపారు. అక్టోబర్ 3 నుంచి టెట్ జరగనుందని, అందుకు సంబంధించిన ఏర్పాట్లు పూర్తి చేసినట్లు పాఠశాల విద్య డైరెక్టర్ విజయరామరాజు తెలిపారు.
అక్టోబర్ 3 నుంచి 21 వరకు ఎంపిక చేసిన సెంటర్లలో ఉదయం, మధ్యాహ్నం పరీక్షలు జరుగుతాయన్నారు.మొదటి సెషన్‌ ఉదయం 9.30 నుంచి మధ్యాహ్నం 12 గంటల వరకు, మధ్యాహ్నం సెషన్‌ 2.30 నుంచి సాయంత్రం 5 గంటల వరకు ఉంటుంది.
అన్ని జిల్లాల డీఈవో కార్యాలయాల్లో సహాయక కేంద్రాలు ఏర్పాటు చేశామని, అభ్యర్థులకు ఎలాంటి సందేహాలున్నా సంప్రదించాలని సూచించారు.
దివ్యాంగ అభ్యర్థుల కోసం స్క్రైబ్‌ను ఏర్పాటు చేయడంతో పాటు అదనంగా 50 నిమిషాల సమయం కేటాయించినట్టు తెలిపారు. ఎవరికైనా రెండు హాల్‌ టికెట్లు వచ్చి ఉంటే వారు ఏదో ఒక సెంటర్‌ను మాత్రమే ఎంపిక చేసుకోవాలని తేల్చి చెప్పారు. పరీక్ష కేంద్రానికి సెల్‌ఫోన్‌ సహా ఎలాంటి ఎలక్ట్రానిక్‌ పరికరాలు అనుమతించడం లేదని స్పష్టం చేశారు.
హాల్‌టికెట్లలో తప్పులుంటే సరైన ఆధారాలు చూపి పరీక్ష కేంద్రంలోని అధికారి వద్దనున్న నామినల్‌ రోల్స్‌లో సరిచేసుకోవాలని తెలిపారు. హాల్‌ టికెట్లు తీసుకోని అభ్యర్థులు cse.ap.gov.in నుంచి డౌన్‌లోడ్‌ చేసుకోవచ్చు.
