ఏపీ ఉపముఖ్యమంత్రి, జనసేన అధినేత పవన్ కళ్యాణ్ తిరుమల పర్యటనలో ఉన్నారు. ప్రాయశ్చిత దీక్షలో భాగంగా తిరుపతికి వచ్చిన పవన్ కళ్యాణ్ అలిపిరి నుంచి నడక మార్గం ద్వారా తిరుమల చేరుకున్నారు.
పవన్ కు టీటీడీ సిబ్బంది స్వాగతం పలికారు. పవన్ తో పాటు జనసేన నేతలు, అభిమానులు భారీగా తిరుమల తరలి వచ్చారు. ఈ రాత్రికి తిరుమలలోని గాయత్రీ నిలయం గెస్ట్ హౌస్ లో బస చేస్తారు.బుధవారం ఉదయం శ్రీవారిని దర్శించుకుని, ప్రాయశ్చిత్త దీక్షను విరమిస్తారు. పవన్ కళ్యాణ్ రేపు కూడా తిరుమలలోనే ఉంటారని అధికారులు చెబుతున్నారు.
తిరుమల లడ్డూ ప్రసాదం తయారీలో ఉపయోగించే నెయ్యి కల్తీ గా తేలడంతో పవన్ కళ్యాణ్ ప్రాయశ్చిత దీక్ష చేపట్టారు. గత ప్రభుత్వం హయాంలో ఇలాంటి ఘటన చోటుచేసుకోవడం బాధాకరమని ఆయన ఆవేదన వ్యక్తం చేశారు.
తిరుమల శ్రీవారి ప్రసాదం తయారీలో జరిగిన అపచారానికి ప్రాయశ్చిత్తంగా దీక్ష చేపట్టారు. గుంటూరు జిల్లా నంబూరులోని దశావతార వేంకటేశ్వర స్వామి ఆలయంలో ప్రాయశ్చిత్త దీక్ష తీసుకున్నారు. అనంతరం విజయవాడ ఇంద్రకీలాద్రి పై దుర్గమ్మ ఆలయం మెట్లు కడిగారు. నేడు తిరుమలకు వెళ్ళి అక్కడ దీక్షను విరమించేందుకు సిద్ధమయ్యారు.
