అనంతపురం జిల్లాలో కూటమి నేతల మధ్య బేదాభిప్రాయాలు బయటపడ్డాయి. బీజేపీ అగ్రనేత, మంత్రి సత్యకుమార్ కారును టీడీపీ నేతలు అడ్డుకున్నారు. పురపాలక కమిషనర్ బదిలీ అంశంపై మంత్రి సత్యకుమార్ తో టీడీపీ నేతలు విభేదిస్తున్నారు. సత్యసాయి జిల్లా ధర్మవరంలో వైసీపీ ప్రభుత్వ హయాంలో అప్పటి ఎమ్మెల్యే కేతిరెడ్డికి అనుకూలంగా పని చేసిన పురపాలక కమిషనర్ మల్లికార్జునను తిరిగి ధర్మవరానికి బదిలీ చేయడం అభ్యంతరం తెలిపారు.
ధర్మవరంలోని మంత్రి కార్యాలయంలో నిర్వహిస్తున్న సమీక్షకు కమిషనర్ హాజరు కాగా, టీడీపీ నేతలు, కార్యకర్తలు పెద్ద ఎత్తున అక్కడికి చేరుకుని నిరసన వ్యక్తం చేశారు. కమిషనర్ ను బయటకు పంపాలని నినాదాలు చేశారు. వందలాది మంది ఆందోళనకు దిగడంతో ఆ మార్గంలో వాహనాల రాకపోకలు నిలిచిపోయాయి. పోలీసు వాహనంలో కమిషనర్ మల్లికార్జునను అక్కడి నుంచి తరలించారు.
మంత్రి సత్యకుమార్ బయటకు రావడంతో ఆయనను కూడా టీడీపీ శ్రేణులు చుట్టుముట్టాయి. బీజేపీ అనంతపురం జిల్లా అధ్యక్షుడు సందిరెడ్డి శ్రీనివాసరెడ్డికి వ్యతిరేకంగా నినాదాలు చేశారు. టీడీపీ కార్యకర్తలను పోలీసులు పక్కకు పంపడంతో మంత్రి అక్కడి నుంచి వెళ్లిపోయారు.
