తొలి రోజు ఆట ముగిసే సమయానికి బంగ్లా స్కోర్ 107/3
కాన్పూర్ వేదికగా భారత్, బంగ్లాదేశ్ మధ్య జరుగుతున్న రెండో టెస్టు మ్యాచ్‌లో మొదటి రోజు ఆట ముగిసింది. వాన కారణంగా తొలిరోజు ఆటకు అంతరాయం కలిగింది. మ్యాచ్ గంట ఆలస్యంగా ప్రారంభం కాగా లంచ్‌ బ్రేక్ తర్వాత కొంతసేపు ఆడారు. మళ్ళీ వాన మొదలై తగ్గకపోవడంతో తొలిరోజు ఆట ముగిసినట్లు అంపైర్లు ప్రకటించారు.
బంగ్లాదేశ్ 35 ఓవర్లలో మూడు వికెట్ల నష్టానికి 107 పరుగులు చేసింది. ఓపెనర్లు షద్మాన్‌ ఇస్లామ్‌ (24), జకీర్ హసన్ (0) నిరాశ పరిచారు. ఆ తర్వాత క్రీజులోకి వచ్చిన కెప్టెన్ నజ్ముల్ శాంటో, మొమినల్‌ హక్‌ ఇన్నింగ్స్‌ గాడిలో పెట్టే ప్రయత్నం చేశారు.
లంచ్‌ బ్రేక్ సమయానికి బంగ్లాదేశ్ స్కోరు 74/2గా ఉంది.ఆ తర్వాత 29వ ఓవర్‌లో అశ్విన్‌ బౌలింగ్‌కు కెప్టెన్ శాంటో ఎల్బీగా వెనుదిరిగాడు. క్రీజులో ముష్ఫికర్‌ రహీమ్‌ (6*), మొమినల్‌ హక్‌ (40*) ఉన్నారు. భారత బౌలర్లలో ఆకాశ్ దీప్‌ రెండు తీయగా అశ్విన్‌ ఒక వికెట్‌ తీశాడు.
