ఆంధ్రప్రదేశ్ సచివాలయ ఉద్యోగుల సంఘానికి రాష్ట్రప్రభుత్వం నోటీసులు జారీ చేసింది. ఎన్నికల కోడ్‌ ఉల్లంఘనల ఆరోపణలపై వివరణ ఇవ్వాలని తాఖీదుల్లో పేర్కొంది. ఏపీ సచివాలయ సంఘం గుర్తింపు ఎందుకు రద్దు చేయకూడదో తెలపాలని కోరింది.
ప్రభుత్వ ఉద్యోగులుగా ఉంటూ ఎన్నికల ప్రచారంలో ఎలా పాల్గొన్నారో వివరణ ఇవ్వాలని కోరింది. సంఘం అధ్యక్షుడు వెంకట్రామిరెడ్డి అందుబాటులో లేకపోవడంతో అప్సా తరఫున కార్యదర్శి కృష్ణ, ఇతర ఆఫీసు బేరర్లు సమాధానం ఇచ్చారు. వ్యక్తిగత హోదాలోనే వెంకట్రామిరెడ్డి ఎన్నికల ప్రచారంలో పాల్గొన్నట్లు ప్రభుత్వానికి వివరణ ఇచ్చారు.
సచివాలయానికి వెలుపల కార్యకలాపాలపై ఎప్పుడూ తమను సంప్రదించలేదని సాధారణ పరిపాలన శాఖకు తెలిపిన వివరణలో పేర్కొన్నారు. ఎన్నికల్ కోడ్‌ ఉల్లంఘించి ఉంటే ఆయనపైనే చర్యలు తీసుకోవాలని తేల్చి చెప్పారు. ఒక వ్యక్తి గురించి సంస్థ గుర్తింపు రద్దు చేయాలనుకోవడం సరికాదన్నారు. ఏపీ సచివాలయ ఉద్యోగుల సంఘం నుంచి తప్పుకుంటున్నట్లు కార్యదర్శి కృష్ణ తెలిపారు.
