వ్యవసాయ కూలీలపై తేనెటీగలు దాడి చేసిన ఘటనలో ఇద్దరు ప్రాణాలు కోల్పోయారు. ఈ ఘటన శ్రీకాకుళం జిల్లాలో చోటుచేసుకుంది.
రణస్థలం మండలం లంకపేట గ్రామంలో ఒక్కసారిగా తేనెటీగలు చుట్టుముట్టడంతో కూలీలు భయంతో పరుగులు పెట్టారు. వీరిలో ఇద్దరు చనిపోగా మరో ముగ్గురు గాయపడ్డారు. మృతులను కిల్లారి కాంతమ్మ, కిల్లరి సూరి కిష్టప్పడుగా అధికారులు గుర్తించారు.
ఘటనలో గాయపడిన వారిని మెరుగైన చికిత్స కోసం అక్కడి నుంచి విశాఖపట్నంలోని కేజీహెచ్ కు తరలించారు. వారి ఆరోగ్య పరిస్థితి విషమంగానే ఉందని వైద్యులు తెలిపినట్లు స్థానికులు చెబుతున్నారు. ఘటనపై సమాచారం అందుకున్న పోలీసులు లంకపేటకు చేరుకుని కేసు నమోదు చేసి దర్యాప్తు జరుపుతున్నారు.
