వరద ప్రభావిత ప్రాంతాల్లోని ప్రతీ ఇంటికి రూ. 25 వేలు అందజేస్తామని ముఖ్యమంత్రి చంద్రబాబు ప్రకటించారు. ఇళ్లలోకి వరద వచ్చిన బాధితులకు రూ.10 వేలు ఇస్తామని వివరించారు. మొదటి అంతస్తులో ఉండేవారికి సైతం రూ.10 వేలు సాయం అందిస్తామని వెల్లడించారు. బుడమేరు ముంచెత్తిన 175 సచివాలయాల పరిధిలో గ్రౌండ్ ఫ్లోర్ లో ఉండేవారికి రూ.50 వేలు, మొదటి అంతస్తు, ఆపైన ఉండేవారికి రూ.25 వేలు సాయం అందజేస్తామని చెప్పారు.
చిరువ్యాపారాలు చేసుకునే వారికి రూ.25 వేలు, నష్టపోయిన ఎంఎస్ఎంఈ లకు ఆర్థికసాయం అందిస్తామని చంద్రబాబు తెలిపారు. రూ.40 లక్షల నుంచి రూ.1.5 కోట్ల టర్నోవర్ ఉన్న ఎంఎస్ఎంఈలకు రూ.1 లక్ష, రూ.1.5 కోట్లకు పైగా టర్నోవర్ ఉంటే రూ.1.5 లక్షలు సాయంగా అందిస్తామని చెప్పారు.
త్రిచక్రవాహనదారులకు రూ.10 వేలు, బైకులకు రూ.3 వేలు ఇస్తున్నామని చెప్పారు. ఎడ్లబండ్లు కోల్పోయిన వారికి కొత్త బండ్లు అందజేస్తామని ప్రకటించారు.
చేనేత కార్మికులకు రూ.15 వేలు, మగ్గం కోల్పోతే రూ.25 వేలు, ఫిషింగ్ బోట్ల నెట్ దెబ్బతిని పాక్షికంగా ధ్వంసమైతే రూ.9 వేలు, ఫిషింగ్ బోట్ల నెట్ దెబ్బతిని పూర్తిగా ధ్వంసమైతే రూ.20 వేలు, మోటార్ ఫిషింగ్ బోట్లు అయితే రూ.25 వేలు అందజేస్తామన్నారు.
ఎద్దులకు రూ.40 వేలు, దూడలకు రూ.25 వేలు, గొర్రెలకు రూ.7,500, కోళ్లకు రూ.100, షెడ్డు మరమ్మతుల కోసం రూ.5 వేలు, ఎకరా వరికి రూ.10 వేలు, హెక్టార్ పత్తికి రూ.25 వేలు, వేరుశనగకు రూ.25 వేలు, హెక్టార్ చెరకు పంటకు రూ.25 వేలు, హెక్టార్ పొగాకుకు రూ.15 వేలు, హెక్టార్ మొక్కజొన్నకు రూ.15 వేలు, హెక్టార్ రాగులు పంటకు రూ.15 వేలు ఇవ్వాలని రాష్ట్రప్రభుత్వం ప్రకటించింది.
హెక్టార్ సోయాబీన్, పొద్దుతిరుగుడు పంటలకు రూ.15 వేలు, కొర్రలు, సామలు, జనపనార పంటలకు రూ.15 వేలు, పసుపు, అరటికి రూ.35 వేలు, కూరగాయలకు రూ.25 వేలు, మిరప పంటకు రూ.35 వేలు, బొప్పాయి పంట నష్టపోతే రూ.25 వేలు, టమాటాకు రూ.25 వేలు అందజేయనున్నారు.
