టీసీఎస్ ఉద్యోగులకు ఆదాయపన్ను శాఖ నోటీసులు జారీ చేసింది. దాదాపు 40 వేల మంది ఉద్యోగులకు ఈ నోటీసులు అందాయి. టీడీఎస్ కోతలో వ్యత్యాసాలు ఉండటంతో ఆదాయపన్ను శాఖ పన్ను డిమాండ్ నోటీసులు పంపింది. నోటీసులు అందుకున్న వేలాది ఉద్యోగులు ఒక్కొక్కరు రూ.50 నుంచి లక్ష వరకూ పన్ను చెల్లించాలని నోటీసుల్లో పేర్కొన్నట్లు కథనాలు వస్తున్నాయి.
ఆదాయపన్ను శాఖకు చెందిన సాఫ్ట్‌వేర్ అప్‌డేట్ కాకపోవడం, టీడీఎస్‌కు సంబంధించిన వివరాలు వెబ్‌సైట్లో సరిగా అప్ డేట్ కాకపోవడం వల్లే ఇలా జరిగిందని భావిస్తున్నారు. గత ఏడాది పన్ను చెల్లింపుదారులకు చెందిన సమాచారం అందుబాటులో లేకపోవడం వల్లే ఇలా జరిగిందని అనుమానిస్తున్నారు.దీంతో ఐటీ ఉద్యోగులకు అందాల్సిన రిఫండ్లు కూడా నిలిచిపోయాయి.
ఆదాయపన్ను శాఖ తమ ఉద్యోగులకు నోటీసులు జారీ చేయడంపై టీసీఎస్ స్పందించింది. ఆదాయపన్ను శాఖ అధికారులతో సంప్రదింపులు జరుపుతున్నామని, తదుపరి ఆదేశాలు అందేవరకు ఉద్యోగులు ఎలాంటి పన్ను చెల్లింపులు చేయవద్దని టీసీఎస్ సూచించింది. త్వరలో సమస్య పరిష్కారం అవుతుందని సంస్థ తెలిపింది.
