దారుణం జరిగింది. సరదాగా స్నేహితురాళ్లతో బయటకు వెళ్లిన ట్రైనీ ఆర్మీ అధికారులపై దుండగులు దాడికి తెగబడ్డారు. ఈ ఘోరం ఎంపీలో చోటు చేసుకుంది. దుండగులు ఆర్మీ అధికారులను దారుణంగా కొట్టి దోచుకోవడంతోపాటు, వారితో వెళ్లిన ఓ స్నేహితురాలిపై అత్యాచారానికి తెగబడ్డారు. పోలీసులు తెలిపిన వివరాల ప్రకారం.
మధ్యప్రదేశ్‌లోని ఇండోర్ సమీపంలోని మోవ్ ఆర్మీ కాలేజీలో శిక్షణ పొందుతోన్న ఇద్దరు యువ సైనికాధికారులు వారి స్నేహితురాళ్లతో సమీపంలోని ప్రాంతాలను చూడటానికి వెళ్లారు. ఈ సమయంలో ఎనిమిది మంది దుండగులు తుపాకులతో బెదిరించి కర్రలతో దాడికి పాల్పడ్డారు. వారి వద్దనున్న డబ్బు ఫోన్లు గుంజుకున్నారు. ట్రైనీ అధికారులతో వెళ్లిన మహిళపై అత్యాచారం చేశారని పీటీఐ వార్తా కథనాల ద్వారా తెలుస్తోంది. దాడి, అత్యాచారం తరవాత ఒక జంటను వదిలేశారు. అయితే మరో జంటను వదలాలంటే రూ.10 లక్షలు తీసుకురావాలంటూ షరతులు విధించారని పోలీసులు తెలిపారు.
దుండగులు వదిలిపెట్టిన అధికారి తన గోడును ఆర్మీ కాలేజీ సీనియర్ అధికారులకు వివరించారు. వారు వెంటనే పోలీసులకు ఫిర్యాదు చేశారు. పోలీసులు, ఆర్మీ అధికారులు ఘటనా స్థలానికి చేరుకోవడాన్ని గమనించిన దుండగులు పరారయ్యారు. ఆర్మీ అధికారిని విడిపించారు. దుండగులపై కేసు నమోదు చేసి వేట మొదలు పెట్టారు. వారిలో ఒకరికి నేరచరిత్ర ఉన్నట్లు పోలీసులు చెబుతున్నారు. ఈ ఘటన మధ్యప్రదేశ్‌లో సంచలనంగా మారింది.
