భారీ వర్షాలు, వరదలతో ఏపీకి జరిగిన నష్టం విలువ రూ. 6,800 కోట్లు ఉంటుందని రాష్ట్రప్రభుత్వం అంచనా వేసింది. ప్రభుత్వ గణాంకాల ప్రకారం 32 మంది మృతి చెందగా, పెద్ద సంఖ్యలో ప్రజలు నివాసాలు ఇతర ఆస్తులు కోల్పోయారు. 1.69 లక్షల ఎకరాల్లో సాధారణ పంటలు, 18 వేల ఎకరాల్లో ఉద్యానవన పంటలకు నష్టం వాటిల్లింది. దీంతో 2.34 లక్షల మంది రైతులు తీవ్ర ఆవేదనలో ఉన్నట్లు రాష్ట్రప్రభుత్వం పేర్కొంది.
వర్షాలు, వరదల కారణంగా జరిగిన నష్టంపై ప్రాథమిక నివేదిక రూపొందించింది. ఈ ప్రకృతి విపత్తు వల్ల రాష్ట్రానికి జరిగిన నష్టం రూ.6,800 కోట్లు అని అంచనా వేసినట్లు పేర్కొంది.
రోడ్లు భవనాల శాఖకు సంబంధించి రూ.2,164.5 కోట్లు, జలవనరుల శాఖకు సంబంధించి రూ.1,568.6 కోట్లు మేర నష్టం వాటిల్లింది. ఇక మున్సిపల్ శాఖకు రూ.1,160 కోట్లు, రెవెన్యూ శాఖకు రూ.750 కోట్లు, విద్యుత్ శాఖకు రూ.481 కోట్లు విలువైన నష్టం సంభవించింది.
వ్యవసాయ శాఖకు రూ.301 కోట్లు, పంచాయతీరోడ్లకు రూ.167.5 కోట్లు, మత్స్యశాఖకు రూ.157.86 కోట్లు, గ్రామీణ నీటి సరఫరాకు 75.5 కోట్లు, ఉద్యానవన శాఖకు రూ.39.9 కోట్ల మేర నష్టం వాటిల్లింది. పశుసంవర్ధక శాఖకు రూ.11.5 కోట్లు, అగ్నిమాపకశాఖకు రూ.2 కోట్లు నష్టం జరిగినట్టు రాష్ట్ర ప్రభుత్వం వివరించింది.
కేంద్రానికి ఈ ప్రాథమిక నివేదికను రాష్ట్ర ప్రభుత్వం అందజేయనున్నట్లు సమాచారం.
