దిల్లీ మద్యం పాలసీ కేసులో అరెస్టై తీహార్ జైల్లో ఉన్న బీఆర్ఎస్ ఎమ్మెల్సీ కవిత అనారోగ్యంతో బాధపడుతున్నారు. ఆమె తీవ్ర అస్వస్థతకు గురికావడంతో జైలు డాక్టర్ల సూచనల మేరకు ఎయిమ్స్‌కు తరలించారు. కవితకు పరీక్షలు నిర్వహించిన వైద్య సిబ్బంది వైరల్ ఫీవర్, గైనిక్ సమస్యలతో బాధపడుతున్నట్లు తెలిపారు.
గతంలో జులై 16న కూడా కవిత జైల్లోనే అస్వస్థతకు గురయ్యారు. జ్వరంతో ఇబ్బందిపడగా పశ్చిమ దిల్లీలోని హరి నగర్‌లో గల దీనదయాళ్ ఆసుపత్రికి తరలించారు.
దిల్లీ మద్యం పాలసీ స్కామ్ విచారణలో భాగంగా కవిత గత ఐదు నెలలకు పైగా తీహార్ జైల్లో ఉంటున్నారు. ఇటీవల ఆమె బెయిల్ కోసం సుప్రీంకోర్టు పిటిషన్ దాఖలు చేయగా విచారణ ఈ నెల 27కు వాయిదా పడింది. ఈ లోపు పిటిషన్‌పై కౌంటర్ దాఖలు చేయాలని ఈడీకి సుప్రీంకోర్టు ఆదేశాలు జారీ చేసింది. 23వ తేదీలోగా రిజాయిండర్ దాఖలు చేయాలని కవిత తరఫు న్యాయవాదులను సుప్రీంకోర్టు ఆదేశించింది.
