శ్రీశైలం, నాగార్జున సాగర్ ప్రాజెక్టుల గేట్ల పరిస్థితి ఆందోళన కలిగిస్తోందని ప్రముఖ విశ్రాంత ఇంజినీర్, భారీ ప్రాజెక్టుల గేట్ల నిపుణుడు నాగినేని కన్నయ్య నాయుడు అన్నారు. తుంగభద్ర డ్యాంకు సంబంధించి కొట్టుకుపోయిన గేటుకు ప్రత్యామ్నాయంగా స్టాప్ లాగ్‌ను అమర్చడంలో కన్నయ్య నాయుడు కీలకపాత్ర పోషించారు.
ఇరిగేషన్ ప్రాజెక్టుల నిర్వహణ, హైడ్రో మెకానికల్ ఇంజినిరింగ్ నిపుణుడైన కన్నయ్యనాయుడు తెలుగు రాష్ట్రాలకు కీలక సూచనలు చేశారు. అత్యంత కీలకమైన శ్రీశైలం, నాగార్జునసాగర్ ప్రాజెక్టుల గేట్ల జీవితకాలం ముగుస్తోందని, ప్రభుత్వాలు తగిన కార్యాచరణ రూపొందించి అవసరమైన చర్యలు చేపట్టాలని కోరారు.
1970కి ముందు నిర్మించిన ప్రాజెక్టులకు స్టాండ్ బై గేట్లు ఏర్పాటు చేయనందున ఇప్పుడు తుంగభద్రకు స్టాప్‌లాగ్ బిగించాల్సి వచ్చిందన్నారు. తుంగభద్రకు ప్రమాదం పొంచి ఉందని రెండేళ్ళ క్రితమే హెచ్చరించినట్లు గుర్తు చేశారు. ఒకవేళ సమస్య వస్తే ఏం చేయాలనే దానిపై అప్పటి నుంచే ఆలోచించినట్టు చెప్పారు.రైతులకు అందాల్సిన నీళ్ళు వృథాగా సముద్రంలో కలవడం చాలా బాధేసిందన్నారు.
తుంగభద్ర డ్యాం గేట్ల వయసు అయిపోయిందని, కొత్త గేట్లు బిగించుకోవాల్సిందేనని అలా చేస్తే మరో 30 ఏళ్ళు సేవలు అందించవచ్చని వివరించారు. ఇందుకు మొత్తం రూ. 250 కోట్ల నుంచి 300 కోట్ల వరకు ఖర్చవుతుందని ప్రభుత్వం తగిన చర్యలు తీసుకుంటే అవసరమైన సాయం అందించేందుకు తాను సిద్ధంగా ఉన్నట్టు చెప్పారు.
నాగార్జున సాగర్, శ్రీశైలం ప్రాజెక్టుల వయసు కూడా అయిపోయిందని, వాటిని ఇప్పుడు ఎక్స్‌టెన్షన్‌లోనే నడుపుతున్నట్టు కన్నయ్యనాయుడు తెలిపారు. తుంగభద్రలాంటి ఘటనలు గతంలో దేశంలో జరిగినా నీళ్ళు ఉండగా ఎక్కడా స్టాప్ లాగ్‌లు అమర్చలేదన్నారు.
